Тывада “Өөредилге” национал төлевилел-биле ниити 7 183 олуттуг 10 чаа школаны тудары көрдүнген. Оларның аразында Таңды кожууннуң Бай-Хаакта 825 база Балгазында 616 олуттуг школа тудуглары база ол программаже кирип турар.
Ук төлевилел Президент Владимир Путинниң эгелээшкини-биле 2019 чылда ажылдап эгелээн. “Кижиниң чедиишкинниг келир үези шынарлыг өөредилгеден болгаш янзы-бүрү талаларын сайзырадырындан хамааржыр” – деп, ол чугаалаан.
Кожууннуң девискээринде өөредилге черлериниң тудуглары Тываның Баштыңы Владислав Ховалыгның идепкейлиг ажылының ачызында эгелээн. Регионнуң удуртукчузунуң саналдары болгаш эгелээшкиннери федералдыг деңнелге деткимчени ап турарын демдеглээри чугула.
Амгы үеде Балгазын школазының тудуунда ажылдарның хөй кезии кылдынган. тың чугаалап турары-биле алырга, школаның котельнаязынга болгаш суг арыглаар черинге ажылдаары-биле кожуундан 5 кочегарны Вятскының күрүне университединче өөредип чоруткан. Амгы үеде олар өөренип алгаш келгеш, улаштыр ажылдаары-биле стажировказын эртип турарлар.
“Школа тудуу доосту бээрге, амгы үениң тускай дериг-херекселдери, бойдус шинчилээр эртемнерге лабораториялар-биле дериир. Ол ышкаш улуг спорт залы болгаш чемненир чер база турар” – деп, Эмер-оол Сат демдеглээн.
Тудугнуң проравы Эртине Сааяның чугаалап турары-биле алырга, чаа школа 5 кезектен тургустунган. Бир талазынга улуг школа, а өске чартыынга эге класстар өөренир. Ортузунга хуралдаар, культура хемчеглери эрттирер зал, а ооң чанынга улуг, биче школаларның спорт залдарын кылыр.
“Амгы үеде мында хары угда иштики, даштыкы болгаш агаар кирер черлерин кылыр ажылдар чоруп турар. Ниитизи-биле 43 кижи, 5 техника ажылда хаара туттунган. Школа хериминиң иштинге улуг стадион болгаш уруглар ойнаар шөлчүгештер база кылыр бис” – деп, Эртине Саая демдеглээн.
Оон аңгыда, республиканың деткимчезиниң ачызында школага 4 чаа автобусту база берген.
Чаа школаларны суурнуң кыдыында тудуп турар ужур-ла бар. Суурлар улгадып, бажыңнар немежип турар болганда, школа туттуна бээрге, ону долгандыр бажыңнар көвүдей бээри демдеглеттинип турар.
Балгазында 616 олуттуг школаны 2022 чылдың ортузунда “Өлчей”, а Бай-Хаактың школазын “Элита” КХН тудуп эгелээн. Школалар тудуун кайызын-даа келир өөредилге чылының эгезинге чедир тудар сорулганы салган.
Чыжыргана СААЯ.
Буян Ооржактың тырттырган чуруктары.
"Шын" №2 2024 чылдың январь 13
