Чөөн-Хемчик кожуунда «Шуралгак» стационар лагерьниң 1-ги ээлчээ июнь 10-нуң хүнүнде эгелээн.
Ында 50 уруг арыг агаарга дыштанып турар. Уругларны “220 вольт”, “Альфа-1”, “Альфа-2”, “Эзирлер” деп аттыг 4 аңгы отрядтарга хуваап, оларның кыйгызын болгаш ырызын ээлчегниң баштайгы хүннеринде-ле тодараткан. Эртенги сула шимчээшкин болгаш чемненген соонда, баш удур бадылаан программа ёзугаар хүн бүрүде уругларның дыштанылгазының хемчеглерин башкылар эрттирип турар. Чоогунда дагларже үнүүшкүн, адаан-мөөрей, шыдыраа, шашки, “Шуралгактың тажы биле даңгыназы – 2023”, спортчу оюннар, саң-хөө талазынга болгаш орук дүрүмүнге билиглер-биле чепсегленири дээш кандыг солун хемчеглерни чок дээрил.
«Хуулгаазын шөл» деп оюнга оолдар болгаш уруглар аажок сонуургап киришкен. Аңаа чечектер дугайында айтырыгларны болгаш даалгаларны башкылар тургузуп белеткээн. Оюннуң кол сорулгазы уругларның угаангыр-сагынгырын, үнүштер дугайында билиин бедидери база делегейже көрүжүн делгемчидери дээрзин, лагерьниң начальниги Долаана Ховалыг демдеглээн. Барабан долганып турар аразында киржикчилер боттарының сонуургалының болгаш хостуг үезин канчаар шын ажыглап турар дугайында таныштырып чугаалап турганнар. Оюн соонда долгандыр бойдуска хумагалыг болур дугайында уруглар билип алганнар.
Ол ышкаш уруглар болгаш башкылар Элдиг-Хем суурнуң чоогунда Туруг даанче үнүүшкүнге идепкейлиг киришкен. Тыва – сүүр баштыг бедик-бедик тайга-сыннарлыг болгаш делгем ханы ыйгылааштарлыг оран. Балар шагдан тура өгбелерниң бүдүн-бүрүнү-биле өнчү кылдыр арттырып берген оран-таңдызын, олча-кежиин келир салгалдарга ол-ла хевээр хумагалап арттырары – кижи бүрүзүнүң харыысалгазы дээрзин башкылар уругларга тайылбырлаан.
«Шуралгак» лагери 3 ээлчегде ажылдаар: 1-ги ээлчег июнь 10-дан июль 1-ге чедер, 2-гизи июль 4-тен июль 27-ге, 3-кү ээлчег июль 27-ден август 16-га чедер хуусаалыг.
Ээлчег бүрүзүнде 50 уругну хүлээп алыры көрдүнген. Чаңгыс кижиниң путёвказының өртээ 7823 рубль. Чайны өттүр 3 ээлчегге 10 уругну халас дыштаныдары көрдүнген. Тускай шериг операциязының киржикчилериниң уругларынга 1 дугаар сезонда – 2,2 дугаар сезонда – 2 база 3 дугаар сезонда 4 уругну халас дыштандырар. Ол ышкаш назы четпээн уруглар херектериниӊ талазы-биле (ПДН) кезээниӊ хайгааралында турар 4 уругну 1-ги болгаш 2-ги ээлчеглерге дыштандырар.
Алиса ДОНГАК.
Чурукту интернет четкизинден алган
