ИЮЛЬ 16-ДА ТР-НИҢ БАШТЫҢЫ ВЛАДИСЛАВ ХОВАЛЫГ «ЭЛЬБРУСМЕТАЛЛ» АН-НИҢ ЧИҢГИНЕ ДИРЕКТОРУ ЕВГЕНИЙ БАЛУКОВ-БИЛЕ УЖУРАШКАН.
Ажыл-агыйжы ужуражылга үезинде Тывада Тастыг девискээринден литий химиктиг элементини казып тыварының дугайында чугаалашкан.
Владислав Ховалыгның медеглээни-биле алырга, «Эльбрусметалл» холдингизи Тастыгдан литий казар лицензиялыг. 30 чыл дургузунда тус черге металл тып ажылдаар аргалыг. Республиканың, тус черниң чурттакчы чонундан команда тургузуп алгаш, кады ажылдаар бодалын Евгений Балуков илереткен. «Профессионалитет» федералдыг төлевилелиниң деткимчези-биле ТР-ниң Өөредилге яамызы-биле кады ажылдаар дугайында керээге Евгений Балуков атты салган.
Ак-Довурактың даг техникумун амгы шагның чаа дериг-херексели-биле дериир. А бүдүрүлге компанияларының ажылдакчылары ук техникумнуң өөредилге программазынга эдилгелерни киирип болур.
Бо арга-биле аныяктарывыс амгы үениң арга-мергежилин билип алырынга болгаш улуг бүдүрүлге черлеринге ажылга тургустунуп алырынга дузалаар. Ынчан кадрлар айтырыы шиитпирлеттинер.
«Эльбрусметалл» компаниязының удуртулгазы чурттуң аңгы-аңгы өөредилге черлеринде Тывадан өөренип турар студентилерни ажылга хүлээр база практика эртеринге дузалажыр дугайында сонуургалдыг. Оон аңгыда, чаңгыс чер чурттугларывыска өске регионнарда улуг бүдүрүлге компанияларынче ажылдаар аргаларны тургузарын планнап турар.
ТР-ниң Чазааның парлалга албанының медээзинден.
"Шын" №53 2024 чылдың июль 17
![](https://sun4-18.userapi.com/s/v1/ig2/kw3v6p2zKFuZ52KxT_I2KNG7XxkxzidNjEPF6K2MEXx6kCv2YT0Bbdua3UrNtsgplEyhTj2SjbWQomSor1EdKtyy.jpg?quality=95&as=32x21,48x32,72x48,108x72,160x107,240x160,360x240,480x320,540x360,640x426,720x480,1080x720,1280x853&from=bu&u=CWQbYiBs85J8ruuCINEF4kSimBN-rk6pwFSa0uYsgOI&cs=807x538)
![](https://sun4-18.userapi.com/s/v1/ig2/8S9M-Yds48Bnqe7QKRK7uF7CJO3-yG_dttvWaHt5QbKbvZ6U5tzjQlLxCbNsfCS5mkETv98K_zGMKMLezxwjIoT1.jpg?quality=95&as=32x19,48x29,72x43,108x64,160x95,240x143,360x214,480x285,540x321,640x380,720x428,1080x642,1280x761&from=bu&u=T4gz0Tr65uCKnWLByOdM1jSBdz5KbmNqrX7gIE0akxs&cs=807x480)