Сүбедей спорт ордузунга декабрь 13–14-те “2024 чылдың тергиин шыдыраачызы” деп маргылдааны ТР-ниң Спорт ямызы, Маргылдаалар эрттирер эргелел база Тываның шыдыраа чөвүлели бедик деңнелге эрттирген. Маргылдааның кол сорулгазы — шыдыраага Россия болгаш делегей чергелиг шыырак шыдыраачыларны база мастерлерни, гросмейстерлерни белеткээри.
Маргылдааның чуруму езугаар кордакчылар Долаан Салчак база Кежик Монгуш декабрь 13-те 2 оюн база 14-те 2 оюн, ниитизи-биле 4 оюнну (2 ак, 2 кара) ойнаан. Тиилекчи илереттинмейн, сан дең болур болза, декабрь 15-те немей дүрген оюну ойнаар. Шаңналдары: 1-ги чер — 100 муң рубль, 2-ги чер — 50 муң рубль.
Декабрь 13-те 1 дугаар оюн 11 шактан, 2 дугаары 16.00 шактан кежээ 8.00 шакка чедир ойнаан. Түңнелинде, сан хайым 0,5–0,5 болган. Дараазында 2 дугаар хүнде 3 дугаар оюн Кежик Монгушка дүжүттүг болган. Ол уткаш, 1 сан мурнай берген. 4-кү оюнда ойнакчылар кайызы-даа дидим халдап ойназа-даа, хайым болуп доозулган. Маргылдааның түңнели-биле, Кежик Монгуш 2,5 база Долаан Салчак 1,5 саннарлыг оюнун эртежик доосканнар.
“Тергиин шыдыраачы–2024” деп атты спорт мастеринге кандидат, аныяк шыдыраачы Кежик Монгуш төлептиг болган. Тулган тиилекчиниң деткикчилери угбазы Сюзана Норбу база даайы, күүйү белек кылдыр дуңмазы Кежикке алдындан чайырлаан 4 чүзүн малдың база 2 дугаар чер алган Долаан Салчакка чараш эзер ойнаарактарны сөңнээннер.
Маргылдааның кол шииткекчизи Чечек Ховалыг, кол секретары Сергей Түлүш, Маргылдаалар эрттирер эргелелдиң даргазы Эрес Аптыы, чаштарның шыдыраа чөвүлелиниң даргазы Дайынчы Ондар, Дээди Хуралдың депудаты Ролан Ооржак олар шыдыраа мастерлерин, баштайгы гросмейстерни белеткээриниң айтырыгларын чугаалашканнар.
Даартазында, 12.00 шакта, рейтингизи 1700 баллдан өрү 9 шыырак шыдыраачы дүрген шыдыраа оюнунга киришкеннер. Маргылдааның кол шииткекчизи келир үеде делегей чергелиг шииткекчи болур күзелдиг Долзат Наксыл база кол секретары Сергей Түлүш дүрген оюн швейцар чурум-биле 9 оюнга болурун чарлаан. Түңнелинде, 1-ги черни 19 харлыг Кежик Монгуш алгаш, 1200 акша-биле, 2 дугаар черни 16 харлыг Болат Бадыраа алгаш, 800 акша-биле, 3 дугаарын шыырак шыдыраачы Херел Сандай-оол алгаш, 600 акшаның шаңналдарын алганнар.
“2024 чылдың тергиин шыдыраачызы” деп шаңнал алган тиилекчиниң шаңналын декабрь 20-де чылды түңнээн “Спортчу Элита-2024-ке” тыпсыр.
Алексей ЧАМБАЛ-ООЛ, спортуң хоочуну.
“Шын” №97 2024 чылдың декабрь 18
