Генерал-майор Чанмыр Удумбара 1948 чылдың апрель 20-де Тыва АССР-ниң Бии-Хем кожууннуң Ээрбек суурга төрүттүнген.
Ол айыыл-чок органнарынга албанын 1972 чылда эгелээн. Федералдыг айыыл-чок чер албанының Тыва Республикада девискээр органын 1991 чылдан 2001 чылга чедир удуртуп келген.
Россия Федерациязының Федералдыг хуралының Федерация чөвүлелиниң кежигүнү болуп, Тыва Республиканың чурттуң дээди хоойлужудулга органының үстүкү палатазынга төлээзи турган.
Чанмыр Александрович Удумбара 30 чылдар иштинде күрүнениң айыыл-чок органнарынга үлегерлиг албанын эрттирип тура, күрүнениң, хөй-ниитиниң, хамааты кижиниң эрге-ажыын камгаалар сорулгаларны бурунгаар көрүштүг, тура-соруктуг,быжыг туруштуг шиитпирлеп чораан.
Хоойлу-дүрүм сагыырын болгаш корум-чурум тударын чедип алыр дээш, ол эрге-хоойлу органнарының күштерин мөөңнеп,кады ажылдаарын чедип ап чораан.
Ооң түңнелинде чуртка-даа, өске регионнарга-даа хөлзээшкиннер болуп турда безин,Тыва Республикага амыр-тайбың, политиктиг турум байдал хандыртынган турган.
Генерал-майор Чанмыр Удумбараның билдилиг удуртукчу, улуг күрүне ажылдакчызы болганы ооң төрүмелинден кижизиг, чончу чоруундан, эртем-билигже, чаа чүүлдерже сундулуундан, ажыл-ишке кызымаандан, организаторжу талантызындан болган.
Хөй чылдар иштинде Чанмыр Александрович федералдыг айыыл-чок албанынче дыка хөй аныяктарны хаара тудуп,оларны күрүнениң быжыг баганазы болур албанның төлептиг ажылдакчылары кылдыр өөредип, кижизидип келген.
Генерал-майор Ч. А. Удумбара федералдыг айыыл чок албанының Тывада девискээр органының материал-техниктиг баазазын чаартып, улгаттырып келгенинден аңгыда, айыыл чок албанның ажылдакчыларының социал айтырыгларын база чедиишкинниг шиитпирлеп келген. Ооң херечизи-Кызыл хоорайның төвүнде, Красноармейская кудумчузунда, федералдыг айыыл чок албанның Тывада эргелелиниң ажылдакчыларынга туткан чылыг, чырык 5 каът, хөй квартиралыг бажың болур.
Россияның Федералдыг хуралының кежигүнү, сенатор тургаш Чанмыр Александрович Тыва Республиканың эрге-ажыын федералдыг деңнелге эки үре-түңнелдиг камгалап чораан. Аңаа ооң федералдыг болгаш регионалдыг деңнелде алдар-ады, хүндүткели, амы-хууда харылзаалары, ажыл-агыйжы айтырыгларны бүгү тала-биле сайгарып билири улуг рольду ойнаан.
Генерал-майор Чанмыр Удумбара чаңгыс эвес удаа федералдыг болгаш регионалдыг деңнелдиг шаңнал-макталга төлептиг болуп келген.Чурттуң болгаш федералдыг айыыл чок албанының удуртулгазы күрүне шаңналдары-биле ооң кызымаккай ажыл-ижин демдеглеп чораан.
Чанмыр Александрович Удумбараның ады «ХХ чүс чылда Тываның төлептиг кижилери» деп Тыва Республиканың күрүне номунче кирген.
Тываның алдар-аттыг,төөгүже кирген төлептиг оглу Чанмыр Александрович Удумбараны сөөлгү оруунче Кызыл хоорайның Красноармейская кудумчузунуң 144 дугаар бажыңының 26 дугаар квартиразындан (3-кү подъезд) ноябрь 16-да эртенгиниң 10 шакта үдээр.
"Шын" солуннуң редакциязы Чанмыр Александрович Удумбараның чок болганы-биле ооң өөнүң иштинге, уругларынга, төрелдеринге болгаш чоок кижилеринге ханы кажыыдалын илередип, ажыг-шүжүүн үлешкенин илергейлеп тур.