Дөрт темпераментиниң характеристикалары-биле таныжып көрээлиңер.
Сангвиник — дүрген, шимченгир чаңныг кижи. Шупту чүүлдерни эмоционалдыг хүлээп алыр. Өөрүшкү, муңгарал, сонуургал болгаш өске-даа сеткилдерни чоок хүлээп алыр, ынчалза-даа ол сеткилдери турум эвес, дораан өскерли хона бээр. Ындыг улусту И.П. Павлов мынчаар характеристикалаар: «Сангвиник — изиг, дыка шимченгир кижи, ынчалза-даа ол чүгле аңаа хамааржыр солун чүүлдер, доктаамал хөлзээшкин бар болза, ындыг боор. Кажан ындыг чүүлдер чок болза, ол чалгааранчыг, элегер кижи апаар».
Сангвиник өске улус-биле дораан харылзажыр арганы тып алыр. Аралажып чугаалажырынга ол кезээде идепкейлиг, өске кижиниң чугаазынга күзелдии-биле киржи бээр. Танывазы өске улус аразынга ол сугда балык дег бодун алдынар, чаа, өске байдал ону дораан хөлзедир. (Чижээлээрге, Винни-Пух — езулуг сангвиник ол). Ынчалза-даа ооң кижилерге хамаарылгазы доктаамал эвес болгаш өскерлиичел. Багай кижизидер болза, сангвиникке «хамелеоннуң шынарлары» хевирлеттине берип болур. Хамелеон дээрге чырыктың база агаарның салдары-биле кежиниң өңүн өскертиптер селескениң бир онзагай хевири дээрзин билир боор сен. Чогаалчылар хамелеоннуң овур-хевири-биле өскерликчи, турум чаңы чок кижилерни көргүзүп турар. А.П. Чеховтуң «Хамелеон» деп чогаалы бар болгай.
(Уланчылыг).
«Психология» деп өөредилге номундан алган
“Шын” №10 2025 чылдың март 20