Маадырларны деткиир ажыл уламчылаар
2025 чылда чарлаттынган Ада-чурт камгалакчызының чылын Мөңгүн-Тайга кожуунга 2026 чылдың январь 23-те байырлыг байдалга хагган.
Чарлаттынган чыл кожуунга бир онзагай болуп эрткенин олар түңнеп чугаалашкан: Төрээн чурт дээш маадырлыы-биле амы-тынындан чарылган ТШО киржикчилериниң өг-бүлелеринге ханы кажыыдалдыг мөңге хүндүткелин илередип, мөгейигни кылгаш, медальдарны тывыскан. Амгы үеде ТШО-да ыдыктыг хүлээлгезин күүседип турар дайынчыларга чоргааралын илередип, онча-менди чанып келирин күзеп, чылыг-чымчак сөстерни кожууннуң чонунуң мурнундан удуртукчулар чугаалаан.
Ол ышкаш ТШО киржикчилеринге ачы-дуза чедирилгелеринге кожууннуң бүгү чону удаа-дараа демниг чоруун көргүзүп турарын, ылаңгыя доктаамал деткимчезин көргүзүп турар волонтёрларның ажылын бедии-биле үнелеп демдеглээн.
Ада-чурт камгалакчызынга тураскааткан чыл эрте-даа берген болза, ТШО-да киржип турар маадырларны деткиир ажыл ам-даа уламчылаар. Чурттуң айыыл чок чоруу дээш, делегейге тайбың доктаар болзун дээш, маадырларның кылып турар эрес-дидим чоруу кажан-даа уттундурбас дээрзин кожууннуң чону билир.
Шагаа уткуштур ачы-дуза чыылдазы
Шагааның бүдүү айында Камбы-лама эргелелиниң башкылары болгаш Улусчу фронтунуң Тывада регионалдыг салбырының удуртукчузу база Тыва культура төвүнүң артистери Өвүр кожуунга чедип чораан.
Башкылар чонга мөргүл номчуп, үнүп олурар Шагаа байырлалы-биле бүгүдеге экини күзээннер. Улусчу фронтунуң Тывада регионалдыг салбырының удуртукчузу Саима Далчин тускай шериг операциязының киржикчилеринге ачы-дуза чедирилгезинге идепкейлиг киржип турар "Ак-Бедик" болгаш "Надежда" деп кожуунда волонтёрлар штавының кежигүннеринге болгаш кожуун чагыргазынга өөрүп четтириишкин бижиктерин тывыскан.
Номнал соонда Тыва культура төвүнүң артистери чараш ыр-шоорун бараалгатканнар.
Тускай шериг операциязында дайынчыларывыска Шагаа таварыштыр гуманитарлыг ачы-дуза чыылдазы эгелээнин дыңнатканнар.
Таңды кожууннуң чаа чагырыкчызы
2026 чылдың январь 23-те Таңды кожууннуң Төлээлекчилер хуралының ээлчеглиг сессиязы болган. Аңаа ук кожууннуң Төлээлекчилер хуралының комиссиязының чаңгыс аай шиитпири-биле Таңдының чагырыкчызынга Айбек Николаевич Конгарны томуйлаан.
Тожунуң аныяктары Гитара кежээзин эрттирген
Январь 23-те Тожунуң аныяктары Артистиң хүнүнге тураскааткан Гитара кежээзин эрттирген. Аңаа кожууннуң уран чүүлге салым-чаяанныг, ылаңгыя гитарага ойнаар, ырлаар оолдар, уруглар чыглып киришкен.
Олар чон аразында нептереңгей ырларны деңге ойнап, ырлажып, солун кежээни өөрүшкү-маңнайлыг, эп-найыралдыг байдалга эрттирген. Кожууннуң аныяктары моон-даа соңгаар ындыг хевирлиг чогаадыкчы кежээлерге доктаамал киржип турарын дугурушкан.
Чаагай чаңчылдың эгези болган кежээ ам-даа уламчылаар дээрзинге Тожунуң аныяктары бүзүрелдиг.
/ Бистиң корр.
Медээлерни болгаш чуруктарны интернеттен алган.
“Шын” №3 2026 чылдың январь 29