Дүүн Аныяктар өргээзинге «Буянныг чүректер» шимчээшкининиң тургустунгандан бээр 10 чыл болган оюнга тураскааткан Аныяктар шуулганы болуп эрткен.
Аңаа аңгы-аңгы өөредилге черлериниң доозукчулары, студентилер киришкен. Шуулган үш кезектен тургустунган: бирээде, аныяктар болгаш ажыл; ийиде, аныяктар болгаш бизнес; үште, чажыт тема. Хемчегниң үш дугаар кезээ айтырыг-харыы хевиринге болган.
«Ийи дугаар чадазында бодумнуң он чыл дургузунда «Буянныг чүректер» хөй-ниити организациязы-биле кады эрткен оруумнуң дугайында чугаалаар мен. Билир чүүлдерим-биле үлежир мен.
Бодум чаа доосканымда чүнү канчаарын билбес, мурнумда кончуг шыргай арга турар ышкаш сагындырар турган. Эртем-билиг чедип алган аныяктарга «улуг» амыдыралче кирери берге эвес болзун дээш, шак мындыг шуулганны организастаан бис. Кызыл хоорайның мэриниң грантызын ойнап алдывыс. Грантының кол сорулгазы – аныяктарга орук айтыры. Ол орукту бодум эрткен болгаш, чаа доозар аныяктарга ажыл-хожулче тургустунарынга, амыдыралының шын оруун тып алырынга дузалаары. Чоокта чаа тургустунган Аныяктар яамызының сайыды Субудай Викторович база мында келгени дыка өөрүнчүг-дүр, биске деткимче-дир» – деп, «Буянныг чүректер» хөй-ниити шимчээшкининиң удуртукчузу Артыш Моңгуш чугаалады.
«Работа России», ТывКУ-нуң студентилер отряды, «Твой бизнес», Кызыл хоорайның Аныяктар департаментизиниң даргазы, ТШО-нуң хоочуну Эртине Моңгуш олар шупту шуулганга чыылган аныяктарга ажыктыг чүүлдерни чугаалап берген. «Работа России» федералдыг организациязының 14 хардан өрү назылыг оолдар, уругларга тускай программа-биле акша ажылдап алыр аргалар дугайында чугаалааны солун болган.
Шуулганның кол-ла сорулгазы – аныяктарның таныжып-билчип алыры, кады бир-ле чүүлдү кылыры, демнежири.
««Работа Россииге» келгеш, бир-ле чүүлге өөренип алыр арга бар. Баш таарыкчызы, визажист, бульдозер башкарыкчызы дээш янзы-бүрү курстар бар. Өөредилге черлери-биле тускай керээлиг бис. Өөренир күзелдиглерниң өөредилгезиниң өртээн төлеп бээр» – деп, Кызыл хоорайның чонну ажылга хаара тудар төвүнүң ажылдакчызы Айдысмаа Ондар чугаалады.
А. ОНДАР.
Буян ООРЖАКТЫҢ тырттырган чуруу.
«Шын» №7 2024 чылдың январь 31
