Тывада өөредилге инфраструктуразының комплекстиг чаартылгазын чорудар улуг ажылдар уламчылавышаан.
Тываның Баштыңы регионнуң төлевилелдерин федералдыг төпке камгалап, республиканың Өөредилге яамызының күжениишкиннериниң база эки белеткелиниң ачызында, бо чылын “Өөредилге” национал төлевилел шугуму-биле аңгы-аңгы хемчеглерниң боттаныышкынынче федералдыг акшаландырыышкындан регион беш миллиард ажыг акша-хөреңгини хаара туткан.
«Амгы үениң школазы» регионалдыг төлевилел-биле республиканың өөредилге организацияларының материал-техниктиг баазазын чаарткан, «Өзүлдениң точкалары» база кванториумнар ажыткан, чаа школалар тудуу уламчылап, башкылар материалдыг деткимчени алган.
Ниити өөредилгениң кол программалары-биле таарыштырган өөредилге ажыл-чорудулгазын чорудуп турар организацияларны дериг-херекселдер болгаш оран-сава-биле хандырарынче 78 хире сая рубльди аңгылаан. Он муниципалдыг тургузугларда «Өзүлде точказының» 16 төвүн ажыткан. Көдээ черлерде өөредилгени бедидер деп шиитпирлээн башкыларга 13 сая рубльди төлеп берген: конкурс шилилгезинге тиилээн башкы бүрүзү чаңгыс катап төлээр компенсацияны алган. Ук төлевилелге киришкен кижи бүрүзүнге төлевирниң түңү бир миллион рубль.
Кызылдың Вавилин ээтпээнде 825 база Танды кожууннуң Балгазын суурда 616 олуттуг амгы үениң чаа школалары ажыттынган. Чыл төнчүзүнге чедир 825 олуттуг 4 улуг школа тудуу доостур. Оларга Каа-Хем суурда база Таңдының Бай-Хаакта, Кызыл хоорайның Мөңгүн биле Спутник микрорайоннарында школа тудуглары хамааржыр. Чадаана хоорайда 616 база Мөңгүн-Тайга кожууннуң Кызыл-Хая суурда 176 олуттуг школалар тудуу уламчылап турар.
Амгы үениң өөредилге стандарттарының негелделеринге дүүштүр туттунган шупту школалар уругларның өөрениринге кончуг таарымчалыг дээрзин өөредилге сайыды Ренат Ооржак демдеглээн.
2022 чылдан бээр Тывада 46 өөредилге албан черлеринге капиталдыг септелгени чорутканын сагындырып, бо чоокку үеде Бии-Хем кожууннуң Туран хоорайга 825 олуттуг улуг школа тудуу эгелээрин дыңнаткан.
«Инфраструктураның чаагайжыдылгазы шапкын темп-биле чоруп турар. Чоокку үеде өөредилгениң шынары элээн экижиир ужурлуг. Бо бүгү ажылдарның кол сорулгазы – ажы-төлүвүс шылгалдаларны эки дужаап, билдингир дээди өөредилге черлеринче кирип алзын дээш, өөредилгениң деңнелин бедидери»— деп, Ренат Ооржак демдеглээн.
«Уруг бүрүзүнүң чедиишкини» регионалдыг төлевилел-биле 48 сая ажыг рубльге 13 ниити өөредилге организацияларында спорт залдарны болгаш шөлчүгештерни септеп, спортчу клубтарны тургускан. Кадыкшылы кызыгаарлыг уругларның 10 дугаар школазының Черби суурда салбыры, Сукпак суурда аграрлыг интернат-лицейи, Кызыл хоорайның 3, 8 база 11 дугаарлыг школаларының 5 спорт шөлдеринге капитал септелгени чоруткан.
«Аныяк профессионалдар» регион төлевилели-биле аңгылаан 20 ажыг сая рубльди Тываның тудуг техникумунуң баазазынга дүрген профессионал белеткел төвүн ажыдарынче киирген. Ажылчыннарны белеткээр база оларның профессионал өзүлдезинге бот-тускайлаң курузун ажыдарының талазы-биле бүдүрүлгелерниң дилээн көрүп, өөредилге программаларын боттандырар.
Чыжыргана СААЯ.
“Шын” №97 2024 чылдың декабрь 18
