Тывада соңгулдаларда 332 хайгааракчы ажылдап турар. Оларның 17 эң идепкейлии социал четкилерде боттарының арынарында бадылаашкынның чада аайы-биле чорудулгазын чырыдып турарлар.
Оларның кол сорулгазы – соңгулдаларның ажык-чарлыын болдурары болур. Олар дээрге бодунуң хоорайында азы суурунда амыдыралды экижидерин күзээн идепкейлиг хамааты туруштуг бөдүүн кижилер–дир: юристер, эмчилер, башкылар, янзы-бүрү организацияларның специалистери... Соңгулдаларның баштайгы хүнү хажыдыышкын чок, оожум-топтуг эртип турарын хайгааракчылар демдеглеп турарлар. Даң бажындан тура-ла соңгукчулар соңгулда участоктарынга кээп турарлар.
Юлия Салчак: «Соңгулдаларның баштайгы хүнү оожум-топтуг эртип тур, янзы-бүрү соңгукчулар, ооң иштинде федералдыг структуралардан база, чай-хос аразында бадылап кээп турлар. Аныяктар, ат-сураглыг кижилер база аңаа идепкейлиг киржип турары өөрүнчүг, чижээлээрге, сураглыг мөге Ай-Демир Монгуш».
«Doll Garma» никтиг хайгааракчы: «Участок ажыттынып турар үеде бадылаашкын хааржактарын хынап көрдүм. Хоойлужудулганың бүгү негелделерин сагаан-дыр, дөгерезин чуктап каан база таңмалап демдеглээн”. Участок соңгулда комиссиязының ажылдакчылары-биле кады хайгааракчы кижи кадыкшылының байдалы-биле участокка дорт бадылап шыдавас хамаатыларже үнүп чедер эргелиг.
Маргарита Монгуш: «Шимченир шинээ чок хамаатының киирген билдириишкинини ёзугаар полицияның ажылдакчызы, а ол ышкаш политиктиг партияның төлээзи-биле кады үнүүшкүннүг бадылаашкынга кириштим. Биске тыпсып бергени үнүүшкүннүг бадылаашкынның № 1 харжаа чуктап каан дүүшкүннүг болду. Соңгукчу бюллетеньни хааржакче суп бадылаан».
Инга Ооржак соңгулда участогунга кижилер бедик көдүрлүүшкүннүг кээп турарын бижээн: «Чаңчылчааны ёзугаар шагдан бээр соңгулдалар бирле байырлал-биле дөмей, ынчангаш аңаа киржип кээп турар кижилерниң тура-соруу бедик, көдүрлүүшкүннүг-дүр! Соңгулдалар үезинде ковидке удур хемчеглерни сагып, кирген-дүшкен соңгукчу бүрүзүнге масканы, салаалыг хол-хаптарын үлеп турары өөрүнчүг-дүр!»
Бүдүн чуртта бадылаашкыннарның чорудулгазын «Вконтакте» социалдыг четкиде #наблюдаюзавыборами хештэгден хайгаарап болур.