Тыва чон шаг-тѳѳгүден бээр тѳрээн черинге, ооң кайгамчыктыг тайга-таңдыларынга, аржаан-сугларынга, хемнер-хѳлдеринге ханы ынакшылын кожаң ырларга, улустуң ырыларынга алгап-мактап чорааннар.
Кожаң ырылар өзүп олурар салгалдарны тѳрээн черинге ынак, ооң тѳѳгүзүнге хумагалыг, чонунуң ёзу-чаңчылдарынга база улустуң аас чогаалының хевирлеринге ханы сонуургалдыг, аңаа камныг болурунга кижизидер.
Ынчангаш тыва улустуң онзагай ыры-хөгжүмүнүң хевири — кожамыктарны ырлажып, аныяк-өскен аразынга нептередир сорулгалыг Тыва үндезин культура төвү “Кожамык байырлалы” деп чараш кежээни эрттирген. Аңаа чыглып келген чон чер-чуртунга тураскааткан кожамыктарны, ада-ѳгбезинден салгал дамчып келген кожаң ырыларны, чоннуң азыраан мал-маганының дугайында база ажы-тѳлүнге хамаарыштыр ырлап чораан кожаң ырыларны, өгбелерниң болгаш оларның салгалдарының ынакшыл, сонуургал темазынга ырлажып чораан кожаңнарын, төрээн черинге ынакшылды, чоргааралды илереткен кожамыктарны артистер-биле кады сагыш-сеткилинден ырлажып турганнар.
Кожамык байырлалынга РФ-тиң алдарлыг артизи, ТР-ниң улустуң артизи Айдысмаа Кѳшкендей, «Тыва кызы» бөлүү, "Саян" хөгжүм болгаш сам театрының аныяк артистери Кежик Дарый-оол база Амырга Монгуш, Кызылдың уран чүүл колледжизиниң сургуулдары «Сайдаяк» бѳлүү, Тываның үрер хөгжүм оркестриниң хөгжүмчүзү Ачын Чооду, “Маны-Саа” студиязының чаптанчыг чаштары, Кызылдың Хоочуннар чөвүлели, Кызылдың 9 дугаар гимназиязының башкызы Светлана Шулу-Маадыр, 19 дугаар школаның башкызы Чочагай Бадыраа өөреникчилери-биле үлүүн киирип, идепкейлиг киришкен.
«Кожамык байырлалы» деп кайгамчык буянныг хемчегниң организакчызы Тыва Республиканың улустуң хөөмейжизи база алдарлыг артизи, "Ада-иениң алдары" орденниң эдилекчизи, "Тыва" бөлүүнүң солизи, тыва кожамыктарның нептередикчизи Шончалай Чооду-Ооржак болган.
Бистиң корр.
Тыва үндезин культура төвүнүң медээзи болгаш чуруу.
“Шын” №5 2025 чылдың февраль 13
