Тываның Чазааның ажылчын бөлүктери 2025 чылда кылып чоруткан ажылын таныштырары-биле апрель 2-3 хүннеринде республиканың бүгү кожууннарынче болгаш Кызыл, Ак-Довурак хоорайларже үнүүшкүннерни кылган. Чон хуралдарынга Чазак Даргазының оралакчылары, республиканың күүсекчи эрге-чагырга органнарының төлээлери болгаш Дээди Хуралдың депутаттары отчётту таныштырып, санал-оналдарны, үнелелдерни хүлээп ап, айтырыгларга харыылаан.
Чонга эптиг болуру-биле эрткен чылда Чазактың кылып чоруткан ажылдарының кол-кол угланыышкыннарын онзалап, республиканың социал-экономиктиг хөгжүлдезиниң чедиишкиннерин, национал болгаш губернатор төлевилелдериниң боттаныышкынын, регионнуң күрүне программаларының түңнелдерин чырыткан видеоотчётту көргүскен. Ону көрген соонда, чон сонуургаан айтырыгларын салып, боттарының чурттап чоруур девискээрлеринге хамааржыр чидиг айтырыгларны көдүрүп, канчаар улаштыр сайзырап болурун саналдаар аргалыг болган. Шак мындыг ажык чугаа чүгле түңнелдер үндүрери-биле кызыгаарланмайн, чоннуң үзел-бодалын өөренип көөрүнге эптиг байдалды тургузуп турар.
Регионнуң Чазаан онзазы-биле Тес-Хем кожууннуң чурттакчылары үнелээн. Ужуражылга үезинде олар кожуунунга чоруттунган төлевилелдер болгаш оларның ачызында болган чаартылгалар дээш өөрүп четтиргенин илереткен. Чыргалаңды чону чаарттынган школазы болгаш ийи чаа кудук дээш, берт-дагжылар ийи кудумчузунуң асфальтылап каан оруу дээш өөрүп четтиргенин илереткен. Оон аңгыда Самагалдай суурнуң клувун чаартып каанынга болгаш бо чылын поликлиникада, модельдиг библиотекада болгаш «Сайлык» уруглар дыштаныр лагерьде эгелей берген ажылдар дээш өөрүп турарын демдеглээн.
Өвүр чону база-ла бедик үнелелди берген. Олар сөөлгү чылдарда кожууннуң культура адырының материал-техниктиг баазазының экижээнин демдеглеп турар: көдээ культура бажыңнары болгаш ном саңнары амгы үениң чаа дериг-херекселдери-биле дериттинген, септелге ажылдарын чоруткан.
Чедиишкиннерге өөрүп четтиргенин илередири-биле катай республиканың чону кожуун, суму аайы-биле кылыр ужурлуг чүүлдерни сагындырып, чагыгларны киирген. Чон хуралдарынга киирген чагыгларның көй кезиинде хөмүр-даш шыгжаар складтар тудуу, ангар хевирниң спортчу залдары, сумулар аразында оруктарның септелгези болгаш тудуу, электри хандырылгазының системазын, уруглар садтарын чаартыры болгаш бокту үндүр сөөртүр ажылды эптиг кылдыр организастаарынга хамааржып турар.
Бадылап каан чурум ёзугаар чондан кирген чагыгларны системажыдып аайлааш, улаштыр өөренип көргеш, ТР-ниң Чазааның ажыл планынче боттандырар сорулгалар кылдыр киирер.
Ниитизи-биле республиканың чурттакчы чону Тыва Республиканың Чазааның 2025 чылда кылып чоруткан ажылын эки деп үнелээн.
Бистиң корр.
Чуруктарны кожууннарның парлалга албаннарындан алган.
“Шын” №13 2026 чылдың апрель 9
