Тыва Республика Сибирьниӊ XV муниципалдыг шуулганынга киришкен. Шуулганга чурттуӊ беш федералдыг округундан 25 регионнуӊ, ооӊ иштинде Тываныӊ, төлээлери киришкен.
Сибирьниӊ XV муниципалдыг шуулганыныӊ кол темазы – муниципалитеттерни эрге-хоойлу талазы-биле деткиири база судтарга камгалаары.
Сибирь федералдыг округта Президентиниӊ бүрүн эргелиг төлээзи шуулганныӊ киржикчилеринге байыр чедииришкинин чоруткан.
Бо шуулганныӊ ажылдап келген үезинден тура ол регионнар аразында сайгарылгалыг чугаа чорударынга эптиг чер болуп турар дээрзин Анатолий Серышев демдеглээн. Муниципалдыг башкарылга адырында кол-кол берге айтырыгларны сайгарып, база чугула шиитпирлерни ажылдап кылыр талазы-биле бүгү чурттан келген эртемденнерге болгаш практиктерге дыка херек.
Тыва Республиканы Инга Ооржак төлээлеп чораан. Ол– ТР-ниӊ юстиция яамызында тус чер бот-башкарылга болгаш муниципалдыг актылар бүрүткелин чорудар талазы-биле эрге-хоойлу килдизиниӊ даргазы.
Тус чер бот-башкарылгазын эрге-хоойлулуг ажылын хандырар, муниципалдыг кадрларныӊ эрге-хоойлу талазы-биле профессионал чаӊчылдарын сайзырадыр, тус чер бот-башкарылга органнарын судтарга камгалаарыныӊ берге айтырыгларын, оларны шиитпирлээр аргаларны ийи хүн дургузунда сайгарып чугаалашкан.
«Тус-тус черлерге удуртулга системазы чедимчелиг болгаш үре-түӊнелдиг ажылдап, бистиӊ хамаатыларывыстыӊ хоойлу ёзугаар эргелерин ажыглап билирин хандырып, оларныӊ менди-чаагай амыдырап-чурттаарынга дузалыг болзун дээш, бис шупту кызып турар болгай бис» — деп, бүрүн эргелиг төлээниӊ оралакчызы Александр Орехов демдеглээн.
Р. ДЕМЧИК очулдурган.
Чурукту интернет четкизинден хоолгалаан.
“Шын” №88 2024 чылдың ноябрь 16
