Таңды кожууннуң Бай-Хаак суурга “Кожууннарның социал-экономиктиг хөгжүлдезиниң онзагайлары” деп кожууннар аразының хуралы болуп эрткен.
Тыва Республиканың Баштыңының кыйгырыынга кызыгаарланып, Бай-Хаак суурнуң Культура бажыңының болгаш школазының оран-савазынга ТР-ниң Эртем талазы-биле агентилели ук хемчегни организастаан.
Аңаа Таңды, Чеди-Хөл, Тожу, Каа-Хем кожууннар киришкеш, республикада күш-ажылчы курлавырлар болгаш чурттакчы чоннуң аай-дедир көжүп турарының, чоннуң кадыкшылының, агаар-бойдустуң өскерлиишкиннериниң болгаш экологияның сайзыралының дугайында айтырыгларны сайгарып чугаалашкан.
Оон аңгыда, эртем талазы-биле ажылдап турар албан черлери эжиктерин ажыдып, шөлчүгештерни организастаан. Аңаа Тываның эртемденнери лекцияларны номчуп, мастер-класстарны эрттирип, кожууннарда дыл талазы-биле байдалды шинчилээр ажылдарны чорудуп, номнар делгелгезин база кылган.
#кожууннар #Таңды #Чеди_Хөл #Тожу #Каа_Хем #Бай_Хаак #социал_экономиктиг_хөгжүлде #Эртем_талазы_биле_агентилел #эртемденнер #Тыва #Тува #медээлер #Шын_солун
