Суггур чаъстар чагганының түңнелинде, хемнерниң суу көдүрлүп, республиканың регионалдыг оруктарының янзы-бүрү кезектериниң байдалы баксыраан.
- Хандагайты – Мугур-Аксы автооруктуң (км 84+000 – км 156+000) байдалы чүгээр.
- Барлык хемниң деңнелиниң көдүрүлгени-биле 107+850 километрде көвүрүг сугга алыскан. Чүгле бедик, чоруу эки машиналарга үрелген черни оюп эртер орук бар. «Восток» КХН-ниң 7 кижилиг бригадазы ында ажылдап турар.
- Торгалыг хемниң суу көдүрүлгенинден Хандагайты – Ак-Чыраа автоорукта (0+000 – км 126+000) көвүрүг үрелген, амгы үеде ону септеп кылган.
- көвүрүгнү катап тургузар, сугнуң унун өскертир ажылдар уламчылап турар. Дүн-хүн чок дежурныйлаашкынны ында организастаан.
- Чадаана – Ийме оруу берге байдалда. 7-ги километрде орукту суг чире шапкан, чогум ояр орук ажылдап турар.
- Чадаана – Бажың-Алаак аразының оруунда шимчээшкин хирелиг. Орукту суг чире алган, оюп эртер орук бар.
- Хемчик хемниң деңнели көдүрүлгенинден Суг-Аксы – Ишкин аразының автооруунуң кезек черлерин суг алган. Кол орукту хагган, ынчалза-даа солагай талакы хажыызында оюп эртер орук бар.
- Тээли суурже чоокшулап олурда, Хемчик хемни кежилдир көвүрүгде суг улуг, амгы үеде ону хагган, чоруу эки машина-хөлге чүгле эртип болур. Ында Ак-Довурактың орус-септелге-тудуг эргелели ажылдап турар.
- Кызыл – Сарыг-Сеп автооруктуң (км 33+000 – км 88+131) байдалы чүгээр. 21 – 23 километрде сугнуң деңнелиниң улгатканы-биле орукту суг ажа халып болурунуң айыылы улуг.
- Эйлиг-Хем суурже кирер орук аксында суг орукту кежир ага берген. Ол чавырлы бээрге, чирилген черлерже сай төгери көрдүнген.
- Алаш, Хемчик, Ак хемнерде сугнуң деңнели улуг!
- Абакан – Ак-Довурак аразының 357 километринде Ак хемниң суунуң дажаанының түңнелинде, эрикти быжыглап турар чалдар, көвүрүгнүң баганалары үрелген! Орукту түр када хагган!
- Тээли – Кызыл-Даг автооруунуң 8-ки километринде көвүрүгнүң чалын суг чире шапкан. Түр када кежигни хагган!
- Кара-Хөл суурже кирер орук аксы. Суг орукче үнүп, хөме алган. Орук хааглыг!
- Суг-Аксы – Алдан-Маадыр аразының оруу база берге байдалда.
- Бора-Тайга суурже кирер орук аксында суг орукче үнүп келген-даа болза, аргыжар черниң байдалы чүгээр.
- Чадаана – Суг-Аксы аразының оруу баксыраан. Машина-балгат эртер орукче суг үнүп, хөме таварып келген.
- Суг-Аксы – Баян-Тала оруунда суг дывыржып үнүп келген. Орукту түр када хагган! Берге черлерни оюп эртер орук бар.
- Дажаан сугнуң соонда Ак-Тал суурже кирер орук аксында суглуг ханы оңгарлар тыптып келген, чогум эки шынарлыг оюп эртер орук бар.
Автооруктарның байдалының дугайында медээ шак санында өскерлип турар.
А. ХЕРТЕК белеткээн.
"Шын" №42 2023 чылдың июнь 10
