Деткимче көргүзер хемчеглер
Россия Федерациязының 89 регионунда мобилизастаан шериглерниң өг-бүлелеринге 50 аңгы деткимче көргүзер хемчеглер чоруп турар. Тыва Республикада ындыг өг-бүлелерге аъш-чем аймаа, 1 баш хой база ыяш, хөмүр-даш-биле дузалаар ажылдар көрдүнген.
Өвүр кожууннуң Дус-Дагның чагырга чери «Торгалыг» кызыгаар заставазы-биле кады мобилизастаан дайынчының ада-иезинге деткимче көргүзери-биле одаар ыяш дүжүрүп берген.
Шак-ла ындыг дузаны шериг оолдарның чааскаан арткан ада-иелери, өг-бүлелери ап турар.
"Хамнааракка" мөөрей
Мөңгүн-Тайга кожууннуң Мугур-Аксы суурда «Хамнаарак» уруглар садының кижизидикчи башкыларының аразынга «Кижизидикчи – 2023» мөөрейни эрттирген. Аңаа кижизидикчи башкылар мастер-класстар, «педагогтуг дебаттар» эрттирип, аразында арга-дуржулга солчуп, чидиг айтырыгларны сайгарышканнар.
Түңнелинде, улуг бөлүктүң кижизидикчи башкызы Чыжыргана Саая «Чылдың кижизидикчизи – 2023» деп атты чаалап алгаш, мөөрейниң кожуун чергелиг чадазынга киржир эргени чаалап алган.
Бүдүү айда тыва идик-хеп
Национал идик-хеви тыва кижиниң чоргааралы, хей-аъды. Амгы үеде байырлалдарда, ылаңгыя Шагаада тыва национал идик-хеп кедери чаңчыл апарган.
Январь 21-ден февраль 25 хүннеринде Өвүр кожуун чагыргазы кожууннуң девискээринге тыва национал идик-хеп кедер Шагаа – 2023 байырлалынга тураскааткан акцияны чарлаан.
Шагааның бүдүү айында социал четкилерге национал идик-хевин бараалгаткан фото-чуруктарны чаңгыс аай #Тывахевим деп хештег-биле салыр.
Кожуун чагыргазы бүгү өвүржүлерни бо акцияга идепкейлиг киржиринче кыйгырып турар.
Демниг ишкинчилер
Ишкин сумузунга Сүт-Хөл кожуундан укталган мөгелер аразынга долгандырыг хевирге тыва хүреш маргылдаазы болуп эрткен. Ниитизи-биле 20 мөге хүрешкен.
Тыва Республиканың Начын мөгези Кайгал-оол Ондар шүүлген (Кара-Чыраа), элээди Арзылаң мөге Туметей Ширижик (Бора-Тайга) үжүүрлешкен, 3 – 4-кү черлерни Соруктуг Калин-оол (Бора-Тайга, Алдыы-Соор), Аян Монгуш (Ишкин, Ийме), 5 – 8-ки черлерни Алик Ховалыг (Ишкин), Алдаржы Ондар (Ишкин), Байыр Кускаайлы (Суг-Аксы), Кудер Сат (Суг-Аксы) алганнар.
Шүүлген мөгениң кол деткикчизи — ТР-ниң алдарлыг чылгычызы Александр Тулуш (Кайгал Саш) шүүлген мөгени 2 харлыг чоруктуг чыраа аът-биле шаңнаан. Үжүүрлешкен мөгени суму баштыңы Алдын-Херел Ондар молдурга-биле, 3 – 4-кү черлерни ирттер-биле сумунуң малчыннары деткээн, 5 – 8-ки шаңналдыг черлер кирген мөгелерни акшалар-биле сумунуң хуу сайгарлыкчылары шаңнаан.
Үнүп келген чылды Чоннуң чаңгыс эп-сеткил чылы кылдыр чарлааны-биле ишкинчилер демниин көргүзүп, маргылдааны бедик деңнелге эрттирген.
/ Алдынай АРАКЧАА белеткээн.
