Эрзин кожуунда август айда чаа тургустунган «Сакура» херээженнер клуву Ѳг-бүле аллеязын болгаш «Шынчы ынакшыл болгаш тайбыңның демдээ» стеланы тургузуп, байырлыг ажыдыышкынны кылган. Чалаттырган ѳг-бүлелер ыяштар болгаш чадаң ыяштарны тараан.
Каа-Хем кожууннуң «Овация» аныяк кѳрүкчүлер театры Бүрен-Бай-Хаак суурнуң «Малышок» уруглар садынче С. Михалковтуң «Үш хаванак» деп шиизи-биле аалдап чораан.
Бо хүннерде Москва хоорайның «Лужники» спорт комплекизинде Тываның тѳлээлери «Школаларже бут бѳмбүү» Бүгү-российжи тѳлевилелдиң эрттирип турары «Хѳм бѳмбүк» маргылдаазында киржип турар. Тээлиден аныяк спортчуларны күш-культура башкызы Айдыс Назыты удуртуп чоруур.
Улуг-Хем кожуунда мал чеминиң белеткели адакталып турар. Кѳдээ ажыл-агый эргелелиниң дыңнадыы-биле алырга, бо хүнде 16 600 тонна сиген белеткеттинген, план- да – 17 600 тонна. Ниитизи-биле бо ажылче 33 бригада хаара туттунган, оларның 28-и механизастыг, 5-и хол-биле белеткеп турар.
Таңды кожууннуң Дүрген болгаш Бай-Хаак сумуларында туттунган ѳскүстер бажыңнарының хажыдыышкыннарын чайлатканын хынаары-биле Президентиниң СФО-да бүрүн эргелиг тѳлээзиниң хыналда департаментизинден Елена Горбунова сургакчылап чораан.
Бистиң корр.
Чуруктарны интернет четкизинден алган.
«Шын» №72 2024 чылдың сентябрь 21