Чазак-чагырганың кежигүннери Тываның Баштыңы Владислав Ховалыгның даалгазы-биле Чаа чыл болгаш рождество байырлалдарының дыштанылгазының үезинде хөй-ниитиниң чурумун болгаш айыыл чок чоруун хандырар сорулгалыг амгы үеде байдалды көөрү-биле кожууннарже үнүүшкүннерни кылган.
Ук айтырыгларның иштинде одалга сезону, чуртталга коммунал ажыл-агый черлериниң ажылы, кожууннарда чурттакчыларның спортчу болгаш культурлуг хемчеглерни организастап турары кирип турар. Оон аңгыда үнүүшкүннер үезинде одалга складтарында хөмүрнүң барын, чонга ону садарын канчаар организастап турарын, регионалдыг болгаш федералдыг оруктарның байдалын, малдың кыштаглаашкынын хынап көрген. Ол ышкаш амыдыралынга айыыл тургустунуп болгу дег назы четпээннерниң өг-бүлелерин база хынап турар.
Удуртукчуларның кол үнүүшкүннери январь 3-тен эгелээн. Чазак Даргазының оралакчызы Айдың Чюдюк ыраккы Өвүр болгаш Мөңгүн-Тайга кожууннарны, база бир оралакчының хүлээлгезин күүседип турар Уран-оол Ондар Сүт-Хөл кожуунну бүрүнү-биле хынап четкен. Январь 3-те чуртталга-коммунал ажы-агый сайыды Мерген Дагба Улуг-Хемге, көдээ ажыл-агый болгаш аъш-чем сайыды Юрий Оруспай Чаа-Хөлге, тудуг сайыды Артыш Кыргыс Чөөн-Хемчикке сургакчылап четкен. Артыш Кыргыс ол чорааш, Чадаана хоорайда школа тудуун хынаан.
Январь 4-те Таңды кожуунга аныяктар ажыл-агыйының талазы-биле сайыт Субудай Оюн Таңдыга четкен. “Шупту социал объектилер хөмүр курлавыры-биле хандырттынган, оран-саваларда температура чогуур деңнелде. Чурттакчы чоннуң хостуг үезин план ёзугаар ажыктыг кылдыр организастап эрттирип турар. 4 ТШО киржикчизиниң өг-бүлелеринге четкеш, Чаа чылдың белектерин чаштарга сундум” – деп, ол дыңнаткан.
Ол ышкаш Чазак Даргазының оралакчызының хүлээлгезин күүседип турар Айдыс Сынаа Эрзинге, юстиция сайыды Евгений Мельников Каа-Хем кожуунга, Саң-хөө болгаш бюджет хайгаараар талазы-биле албанның удуртукчузу Татьяна Монгуш Кызыл кожуунга, Дириг амытаннар камгалаар күрүне комитединиң даргазы Артыш Салчак Ак-Довуракка бүрүн хыналданы чорудуп четкен.
Тургустунган чурум ёзугаар январь 8-тиң хүнүнге чедир хүнүң-не хыналдалыг үнүүшкүннер болур.
