Хүреш делегейинде онза болуушкуннар
Алдарлыг кубин мөге Михейн Лопес август айда Париж хоорайга Олимпий оюннарынга грек-рим хүрешке 5 дугаар алдын медальды аар килге чаалап алган соонда, тренери Рауль Трухильо-биле Россияның спортчу хүрештер чөвүлелинче база Олимпийжи комитетче киргеннер. Улаштыр олар Новосибирскиге Аксенов аттыг мемориалга тураскааткан грек-рим хүрештиң хүндүлүг аалчызы болганнар. Оон август 28-те Саранскыга мастер-классты база эрттиргеннер.
Кубага спортчу хүрештиң сайзыралы 1970 чылдарда Новосибирск чурттуг алдарлыг тренер Василий Ивановтуң удуртулгазы-биле эгелээнин Михейн Лопес база тренери Рауль Трухильо демдеглеп чугаалааннар. База Новосибирск хоорайдан грек-рим хүрешке 3 дакпыр Олимпий оюннарының чемпиону Александр Карелинниң дузазын, сүмезин ап чораанын тренери Рауль Трухильо сактып чугаалаан.
Мемориал маргылдааның ажыдыышкынынга Александр Карелинниң чалааны-биле делегей чергелиг спорт мастери Аян-оол Ондар база хөөмей бөлүү “Алаш” бистиң республиканы төлээлеп ыры-хөөмейи-биле хамыкты кайгатканнар. Маргылдаа соонда Михейн Лопес Россияның чонунга чылыг-чымчак хүлээп алыышкыны дээш улуу-биле четтиргенин илереткеш, ам бир катап албан келирин аазаан. Спортчулар сураглыг кубин мөге-биле сактыышкынның чуруктарын тырттырышканнар.
Төөгүден алгаш көөрге, Михейн Лопес бурунгу Олимпий оюннарынга чүгле хүрешке 7 дакпыр чемпион, Грецияга алдарлыг эртемден Пифагорнуң өөреникчизи Милоннуң соонда 1630 чыл болганда, 2 дугаар болган. Амдыызында делегейде 3 дугаар черде херээжен япон мөге кыс, 4 дакпыр Олимпий оюннарының чемпиону Ичо Каори болуп турар. Ооң соонда хостуг хүрешке Олимпий оюннарының 3 дакпыр чемпионнары Александр Медведь база Бувайсар Сайтиев хамааржырлар.
А. ЧАМБАЛ-ООЛ.
“Шын” №67 2024 чылдың сентябрь 4
