Тываның 4 суурунуң культура бажыңнарында капиталдыг септелгелер чоруп турар. Бо чылдың күзүн Тес-Хемниң Берт-Даг суурга, Бии-Хемниң Өөкке, Тожунуң Салдамга, ол ышкаш Барыын-Хемчиктиң Аксы-Барлыкка чаарттынган клубтар ажылдап эгелээр.
Ук клубтар «Культура» национал төлевилелдиң ачызында чаарттынар. Өөк суурнуң көдээ клуву 57 харлыг. Бо оран-савага бир дугаар улуг септелге-дир. Тудуг объектизинде тус черниң 13 чурттакчызы ажылдап турар. Олар серизин солуур, чаа шалалар чадар, одалга системазын база өртке удур айыыл чок чорук системазын чаартыр, малгаштаар, дозулаар база электри удазыннарын солуур.
«Көдээ культура бажыңында чогаадыкчы коллективтер болгаш клуб ажылдакчылары чедиишкинниг ажылдап турар. Бо клубтан улуг сценаже Тываның алдарлыг артизи Херел Мекпер-оол болгаш өске-даа артистер үнген» — деп, Бии-Хем кожуун чагыргазы дыңнаткан.
Берт-Дагның Культура бажыңы база он-он чылдар дургузунда эргижирээн. Ында база тудуг ажылдары кидин түлүк чоруп турар.
Дамдылап эгелээн серизинге улуг септелге херек. Тус черниң чурттакчылары ынак клувунуң ажыттынарын четтикпейн манап турар.
«Бистиң клуб ажылдакчылары сеткили-биле ажылдап турарлар, олар ёзулуг профессионалдар-дыр. Оларның чогаадыкчы ажыл-ижин суурнуң чону дыка үнелээр» — деп, Берт-Даг суму чагырыкчызының оралакчызы Юлия Сульдум чугаалаан.
Бо чылын национал төлевилелдиң шугуму-биле Тываның культура бажыңнарының капиталдыг септелгезинче ниитизи-биле 50 сая рубльди акшаландырган. Шупту объектилерни хүлээнген тудуг организациялары ажылын үезинде эгелээн болгаш сентябрь 1-ге, а Тожу кожуунга ноябрь 1-ге чедир доозарын планнап турар.
Бистиң корр.
«Шын» №36 2024 чылдың май 18
![](https://shyn.ru/media/cache/2024/05/20/y12bxl0d-uq-1ee97a9ed9.jpg)
![](https://shyn.ru/media/cache/2024/05/20/bsv-gqfcqoy-2382a9c7db.jpg)
![](https://shyn.ru/media/cache/2024/05/20/is5alj3e4b8-59682ff230.jpg)
![](https://shyn.ru/media/cache/2024/05/20/kkcat-hla8m-617e9f30d6.jpg)