Апрель 16-да Кызылдың Алексей Боктаевич Чыргал-оол аттыг уран чүүл колледжизинге “Тываның культуразы: эрткен болгаш келир үези” деп эртем-практиктиг конференция эрткен.
Хемчегни Ада-чурттуң Улуг дайынының Тиилелгезиниң 80 чылынга, Ада-чурттуң камгалакчызының чылынга болгаш Кызылдың уран чүүл колледжизиниң 65 чылынга тураскаадып эрттирген.
10 ажыг шинчилекчилер болгаш эртемденнер культура болгаш уран чүүлге хамаарышкан илеткелдер-биле дыңнакчыларны таныштырган. Хөй кезии ук адырның билдингир, ат-сураглыг кижилериниң юбилейлиг чылдарынга хамаарышкан ажылдар. Чижээ, Монгуш Борахович Кенин-Лопсанның 100 харынга, Зоя Кыргысовна Кыргыстың 80 харынга болгаш Сергей Иванович Бадырааның 75 харлаанынга хамаарышкан.
Дээди болгаш ортумак профессионал өөредилге черлериниң башкылары болгаш культура албан черлериниң ажылдакчылары, уран чүүл школаларының башкылары конференцияга киржир изиг күзелин илереткеннер. Кижи бүрүзүнүң ажылы бот-тускайлаң. “Тываның культуразы болгаш уран чүүлүнүң тургустунарынга үлүг-хуузун киирген кижилер”, “Тыва Арат Республикага шеригжи суртаал плакаттарының хевири болгаш тургузуглары”, “Амгы шагның тываларының өг-бүле ёзулалдары” дээш оон-даа өске онзагай ажылдар хөй болган.
Эртем-практиктиг конференцияның эрттирикчилери мындыг чижектиг шинчилелдерге хамаарышкан хемчеглер удаа-дараа эртерге, чоннуң культуразының төөгүзү кадагалаттынып турар болур, уран чүүлүнүң онза барымдааларын ам-даа ханы шинчилээр сонуургал оттур деп демдеглээннер. Үе шалыпкын өскерлип, сайзырап турар болгаш культураны арттырып алыры чугула.
Бистиң корр.
Чурукту интернеттен хоолгалаан.
“Шын” №14 2025 чылдың апрель 17
