ТР-ниң Культура яамызының эгелекчи саналы-биле “Культурлуг десант” төлевилелди боттандырып эгелээнден бээр 2024 чылдың бирги кварталында бо хүнге чедир чээрби ажыг культурлуг программаларны көдээ черниң чүс-чүс көрүкчүлери сонуургап көөр аргалыг болган.
“Культурлуг десант” төлевилел-биле үнүүшкүн кылган баштайгылар Тыва үндезин культура төвүнүң коллективи болган. Олар январь айда Кызыл кожууннуң Ээрбек суурга, Терлиг-Хаяга, Шамбалыгга чүгле концерт программазындан аңгыда, тыва ёзу-чаңчылдар дугайында солун лекция-беседаларны кылып, Шагаага уткуштур тыва национал оюннарны көргүзүп, өөредип, мастер-класстарны эрттиргилээн. Оон аңгыда, чүгле Тываныы деп таныттынгыр даш чонар уран чүүлге сонуургалдыгларны хаара тудуп, чонар-даштан чараш дүрзүлерни канчаар сиилбип кылырының дугайында солун көргүзүг кичээлдерни чоруткан.
Февраль айда ол-ла төлевилел-биле эстафетаны Тываның Национал оркестри, А. Пушкин аттыг Национал ном саңы болгаш К.Чуковский аттыг уруглар библиотеказы хүлээп алгаш, Тожуга четкен. Адыр-Кежиг, Ий суурларның чонунга “Шагаавыста чолукшуулу” деп солун программаны бараалгаткан.
Март айда республиканың ырак-узак кожууннарының бирээзи Тере-Хөлге Тываның күрүнениң ойнаар-кыстар театры четкен, а Тываның В. Көк-оол аттыг Национал хөгжүм-шии театры “Тын” деп шиини Куңгуртугга көргүскен. Тываның күрүнениң “Саян” ыры болгаш танцы театры Улуг-Хем кожууннуң чеди сумузунга солун программазын көргүскен.
Апрель айда Тываның күрүнениң ойнаар-кыстар театры Барыын-Хемчик кожуунга гастрольдааш, улаштыр Бай-Тайганың Шуй, Бай-Тал, Кызыл-Даг, Тээлиге “Чуня”, “Бременские музыканты”, “Бодарал” деп шиилерин көргүскен.
Апрель–май айларда “Культурлуг десант” төлевилелдиң киржикчилери В. Халилов аттыг Тываның күрүне филармониязының В. Тока аттыг симфониктиг оркестри Кызыл кожууннуң Терлиг-Хая, Баян-Кол, Ээрбек, Элегес-Аксы, Каа-Хем суурларга солун программаны көргүскен.
“Культурлуг десант” төлевилел ТР-ниң Культура яамызының 2024 чылда боттандырып эгелээн база бир кол төлевилелдериниң бирээзи дээрзин сагындыраал.
Бистиң корр.
Чуруктарны интернеттен алган.
“Шын” №39 2024 чылдың май 29
