Тываның Чазаа бо чылын тараа, ногаа аймаа болгаш мал чеми тарып өстүрер шөлдерни он хууга (52,58 муӊ гектар) улгаттырар сорулганы салган.
Чаа-Хөл кожууннуң көдээ ажыл-агый бүдүрүлгелери часкы хову ажылдарынга белеткенип эгелээн.
«Курай» көдээ ажыл-агый хереглел кооперативи тараа культураларын тарыырынга белеткенип, 30 тонна кызыл-тастың шилиттинген үрезинин, 20 тонна сула үрезинин соңгаартан садып алгаш келген.
Тываның Баштыңы Владислав Ховалыг Чаа-Хөл, Сүт-Хөл кожууннарныӊ ажылгыр, эрес-кежээ кызымак чонунуң чылдыӊ-на көдээ ажыл-агый черлерин болбаазырадып, тараа, ногаа аймаан тарып өстүрүп турары хүндүткелди оттуруп турарын социал четкилерде арыннарынга медеглээн. Бир эвес олар тарылга шөлдерин улгаттырар күзелин илередир болза, чугаажок деткиирин Чазак Даргазы онзалап демдеглээн.
ТМГ Медээлер.
