Россияга удур хүлээттинген санкцияларның салдары-биле российжи автомобилистер чамдык даштыкы автомашиналарны, ылаңгыя люкс, премиум класска хамааржыр автомобильдерни садып алыр аргазы чок апарган.
Шак бо байдалды шиитпирлээри-биле, чурттуң Бүдүрүлге болгаш садыг-саарылга яамызы Кыдаттың автобүдүрүкчүлери-биле российжи авторыноктан чоруй барган брендилерни солуур талазы-биле кады-ажылдажылга айтырыгларын чугаалажып эгелээн дээрзин яамының удуртукчузу Денис Мантуров айыткан.
Сөөлгү чылдарда кыдат автомобильдер садып алыкчыларның сонуургалын, бүзүрелин чаалап ап эгелээнин айтып калза чогуур. Тывада база Кыдатка бүдүрген янзы-бүрү марканың, класстың автомобильдериниң саны чылдан чылче көвүдеп олурары каракка көскү. Автомобильдерниң ээлери боттарының эдилелдериниң өске билдингир апарган маркалардан дудак чогун, харын-даа өртек-үне талазы-биле оранчок эки болуп турарын айтып турар.
Денис Мантуров херек кырында российжи рыноктан даштыкы автобүдүрүкчүлерниң чоруур күзели чок дээрзин демдеглээн. Ынчалза-даа политика-биле холбашкан ыйыдыышкынга чагыртыр ужурга чамдыызы таварышкан. Шак бо байдалга чоннуң хереглелин делегейде авторынокту чоорту чаалап ап чоруп олурган кыдат автобүдүрүлгениң хандырыптарынга идегел бар. Ооң-биле чергелештир чурттуң автобүдүрүлге адыры бодунуң ажылын улаштырар талазы-биле хемчеглер база алдынып турар.
И. Санчат.
Чурукту интернет четкизинден алган.
#ОбъясняемРФ #Тыва_тайылбырлап_тур