Бо хонуктарда Норвегияның Мольде деп черде ски-альпинизминиң (кадыр дагга хаак чарыжы) Делегей чемпионады эртип турар. Ында 17 аңгы чурттан шылгараңгай спортчулар киржип келген.
Март 16-да Кыдаттың тывазы ак соян уктуг 18 харлыг Булур элээди оолдар аразынга болган чарышка шылгарап, алдын медальды чаалап алган. Булур 10 км хемчээлдиг 1160 метр бедиктиг 5 дагны 59 минута 15 секунда дургузунда хаактыг эрткеш, бирги черге төлептиг болган. Италиядан Герман Дебертолис Булурга 9 секундага аштыргаш, мөңгүннү, а Австриядан Сильвано Вольф хүлер медальдарны тус-тузунда алганнар.
Кыдатта 2500 хире санныг тывалар Синьцзян-Уйгур автономнуг районнуң Алтай аймаанда Хом, Ханас, Ак-Хава деп суурларда амыдырап чоруурун билир бис. Бо удаада делегей чемпиону болган Булур Алтай аймактың Хом деп суурунга төрүттүнгеш, өскен. Хомда 700 хире санныг тывалар чурттап чоруур.
2021 чылдың декабрь айда Булурнуң чурттап турары Синьцзян-Уйгур автономнуг район хаакка чыынды команданы тургускан. Оол 16 харлыг тургаш, чыынды команданың кежигүнү апарып, а чартык чыл болганда, бодунуң мерген, кашпагайы-биле чурттуң чыынды командазынче кирген.
Делегей чемпионадынга киржир мурнунда, март айның эгезинде, Булур Азияның чемпионадынга киржип, үш дакпыр алдын медальды чаалап алгаш, Азияның кадыр дагга хаакка чемпиону болган.
Бурун шагда тываларның аңнаар-меңнээрде кештен кылган хаакты ажыглап чораанын шупту билир бис. Кештен кылган хаакты Кыдаттың тывалары амыдыралында ам бо хүнге чедир ажыглап чоруур. Булур чажындан тура хаактаарынга ынак турганын демдеглеп чугаалап турар. Хензиг суурга тайга эдээнге өскен малчын оол чажындан ойнап келген оюнун хаакты профессионал спортче бир шагда шилчий бээрин кайыын билген боор. Аңчы өгбелериниң арттырып кааны хаакка ханы ынакшылы ам бо үеде Булурну делегейниң шыырак белеткелдиг спортчулары-биле чаңгыс деңнелге турар кылдыр эккелген.
Миллиард чурттакчылыг кыдаттар аразынга шылгарааш, биче-буурай тыва чонунуң хей-аъдын көдүрген, аңчы өгбелериниң изин изээн салым-чаяанныг дуңмавыс Булурга моон-даа соңгаар спортчу чедиишкиннерни күзеп, сүлде-сүзүү бедик чоруурун йөрээп каалыңар! Бай Алдай сени кезээде кадагалаар болзун!
Бады-Очур ӨЛЗЕЙ.
Чуруктарны авторнуң архивинден алган.
“Шын” №21 2024 чылдың март 20
