Тываның Баштыңы Владислав Ховалыгның даалгазы-биле апрель 17–18 хүннеринде яамыларның болгаш албан черлериниң оралакчы даргаларынга баштаткан ажылчын бөлүктер кожууннарның бүгү-ле суурларын эргий кезип, чон-биле ужуражып турарлар. Олар 2023 чылда кылдынган ажылдарның түңнелдери-биле таныштырып, бо чылын мурнады көөр сорулгаларны чугаалаан. Ыраккы Тере-Хөл кожуунга отчёттуг кампания шала орайтадыр – апрель 25-тен апрель 29-ка чедир болур.
Чаңчылчаан ужур ёзугаар ужуражылгалар диалог хевирлиг эртип турар: ылавылаан айтырыгларны салып, чагыгларны киирип, санал-оналдарны берип турарлар. Сайыттар кабинединиң ажылчын бөлүү Тес-Хем кожууннуң чону-биле ужурашкан. Аңаа чон-биле Күш-ажыл болгаш социал политика, Орук болгаш транспорт, Көдээ ажыл-агый, Кадык камгалалы, Культура яамыларының, «Сайзырал» төвүнүң удуртукчулары чугаалашкан.
Эрге-чагырганың төлээлерин кичээнгейлиг дыңнааш, Чазактың эрткен чылын кылган ажылынга тес-хемчилер демдекти салып, салдынган сорулгаларын ол күүседип шыдаан деп демдеглээннер. Чер-черлерде чагырга черлери Чазактың ажылынга “тергиин” деп демдекти салган.
Аяс Сакпай, Кызыл-Чыраа школазының башкызы:
— Национал болгаш губернатор төлевилелдерин база комплекстиг программаларны таварыштыр суурну тынгарып, дыка хөй төлевилелдерни боттандырган. Бистиң суурда чаа школаны, ФАП-ты туткан. Барык чаа чылдың бүдүүзүнде, декабрь 27-де, «Сорунза» губернатор төлевилелиниң ачызында көдээ Культура бажыңы ажыттынган. Бистиң чурттакчыларывыс чаңгыс үн-биле суурнуң катап дирилгениниң дугайында чугаалап турарлар.
Наталья Монгуш, Шуурмак суурнуң чурттакчызы:
— Дыка хөй буянныг үүлени бүдүрүп, хөйнү тудуп, специалистерни — башкыларны, эмчилерни деткээн-дир. Мээң саналым болза, Тываның Чазаа эки ажылдаан-дыр, мээң салыр демдээм — “беш”
Оксана Степанейкина, Шуурмак суурнуң чурттакчызы:
— Деткимчениң ачызында дыка хөй бичежек бүдүрүлгелер, арат ажыл-агыйлары бистиинде ажыттынды. Ажыл чоктарның саны кызырлып, ажылдаарынга хөй арга-шинек көстүп келгени өөрүнчүг.
А. ХЕРТЕК белеткээн.
Чурукту интернеттен алган.
“Шын” №30 2024 чылдың апрель 20
