Чоннуң амыдыралын экижидип, чурттуң экономиктиг байдалын сайзырадыр сорулга-биле «Социал керээ» күрүне программазын ажылдап кылган.
Сөөлгү каш чылдарда ук программаның ачызында дыка хөй ажыл чок хамаатылар ажы-төлүн азыраар, амыдыраар акша-төгерик ажылдап алыр ажыл-агыйны эгелеп, хууда сайгарлыкчылар апаргылаан.
2021 чылда Тываның 3500 ажыг чурттакчызы, 2022 чылда 4073 хамааты, а 2023 чылда 3800 кижи ук программаның деткимчезин алган болза, 2024 чылда 2930 хамаатыга деткимче көргүзери планда көрдүнген. Чыл эгезинден август төнчүзүнге чедир 1175 хамааты социал керээ күрүне программазының деткимчезин алган. Чыл төнчүзүнге чедир план күүсеттинер дээрзи чугаажок.
Ук программаның деткимчези-биле 2024 чылда 808 ажыл чок хамааты Чонну ажылга хаара тудар төп таварыштыр ажылдай берген. 966 хамааты хууда сайгарлыкчы болуп, биче бүдүрүлгени эгелээн. 719 өг-бүле хууда мал-маган азыраар, көдээ ажыл-агыйны ажыдып алган.
Үстүнде айыттынган сан-чурагайлардан алгаш көөрге, «Социал керээ» күрүне программазы чонну ажылга хаара тударынга, чурттуң экономиктиг байдалын хөгжүдеринге улуг ужур-дузалыг болганының херечизи-дир.
Хууда сайгарлыкчы болуп, ажыл-агый эгелеп турар хамаатыларның ажылының кол угланыышкыны даараныр цехтер, хлеб быжырар черлер, манчы-хуужуур кылып, доңуруп садар биче бүдүрүлгелер, ыяштан чазаныр, алгы-кештен тыва национал хептер даараар шеверлер, демирден ажыктыг дериг-херексел кылыр дарганнар, эът-чем ыштап, болбаазырадып садар улус дээш оларның аразында черле кымнарны чок дээрил. Хууда сайгарлыкчыларның аразында чараштаныр өргээ ажыдып, бьюти сфераже киргеш, өг-бүлезин азырап чоруур аныяктар база дыка хөй.
Өг-бүлези-биле хууда ажыл-херек эгелеп алыксап чоруур, хөй ажы-төлдүг, ажыл чок хамаатыларны чурттап турар сумузунда чагырга черинге барып, арга-сүмеден ап, херек документилерни чыыры күзенчиг. Тыва улустуң «Кыры шимчээр, хырын тодар» деп үлегер домаанда дег, олут орбас, чыдын чытпас, ажылгыр-кежээ улус бо шагда бай-шыырак, балдыры дыңзыг чурттаар үе-дир. Чүгле кижи бүрүзүнүң бодундан хамааржыр дээрзи чугаажок.
Айдың ОНДАР.
Чурукту интернеттен алган.
“Шын” №68 2024 чылдың сентябрь 7
