Бүгү-делегейниң херээженнер хүнүнүң бүдүүзүнде, март 7-де, Чадаана хоорайның Культура хөгжүлдезиниң дыштанылга төвүнге кожуун чергелиг шуулган болуп эрткен. Шуулганга Тываның Херээженнер эвилелиниң даргазы Людмила Салчак, оралакчы даргазы Ольга Дондуй, Улуг-Хем кожууннуң куратору Шончалай Донгак, Дээди Хуралдың төлээзи Лада Монгуш аалдап келген.
Чөөн-Хемчик кожууннуң чагырга бажыңынга кожууннуң баштыңы И.Б. Монгуш база чагырыкчының албан-хүлээлгезин түр үеде күүседип турар А.Д. Куулар келген даргалар-биле арга-дуржулга солчуп, чугаалашкан. Айдыс Дарый-оолович хөй-ниитижи херээженнер, адалар, хоочуннар, аныяктар чөвүлелдерин деткип, олар-биле сырый ажылдап, ажыл планын катай тургузуп, демнежир сорулганы салганнар.
Херээженнер чөвүлелиниң шуулганы «Херээжен чон кадык ниитилел дээш» деп солун, ажыктыг темага болуп эрткен. Кожууннуң социал политика даргазы Джамиля Монгуш, Чадаана хоорайның культура хөгжүлдезиниң төвүнүң директору Чодураа Сат, кожууннуң Херээженнер чөвүлелиниң даргазы Мария Куулар, оралакчы даргазы Долаана Доскаар, Тываның Херээженнер эвилелиниң Чөөн-Хемчикте куратору Уран Сонам олар шуулганны уштап-баштап эрттирген.
Аңаа суму бүрүзүнүң социал политика даргаларының оралакчылары шуулганга он ийи Херээженнер чөвүлелин баштап алгаш, киржип келгеннер, оларның саны сезен дөрт. Шуулганга шупту ийи чүс бежен активчи киришкен. Оларның аразында төлептиг хоочун башкылар, чагырга ажылдакчылары хаара туттунган.
Кежигүн бүрүзү талантызын көргүзүп киришкен. Чижээ, лидер ава сумузун таныштырып камгалаан, салым-чаяанныг кыс талантызын бараалгаткан, ус-шевер кадын ажылдарын делгээн, бижиир кижи сумузунуң социал четкилеринче болган шуулганны чырыдар, кижизидикчи башкы психолог келген чонга дузазын көргүскен, сайгарлыкчы аъш-чемин садып-саарган, эң-не идепкейжи херээженнер мода көргүскен.
Делгелгеге чеди суму болгаш хоорайның чурттакчылары киришкен. Аргаан-даараан, чазаан-чураан, оюп кылган ажылдар, кидистен кылыглар, тыва чемнер, дузаан, вареньелээн аъш-чем, хаптыг артыш, эм оъттар дээш оон-даа өске чүү-даа бар, кижи магадап ханмас.
Делгелгеге Чыраа-Бажы, Теве-Хая, Элдиг-Хем, Бажың-Алаак, Хөндергей, Шеми сумуларының кыс чону шыырак белеткелдиг киришкен. Чадаана хоорайдан Долаана Доскаар онза чараш кидистен кылыгларын делгеп салган.
Сумуларның ажылы эки деп чүүл шуулганга көстүп турар-дыр. Кожууннуң төп эмнелгезиниң онколог эмчизи Милада Сергеевна чалаттырган, келген чонга тестилер, аарыглар дугайында чугааны чоруткан.
Бүгү-делегейниң херээженнер хүнүн уткуштур хөй ажы-төлдүг, хөй чылда үре-түңнелдиг ажылдаан хоочуннарны орден-хавыяа-биле, хүндүлел бижиктер-биле кожууннуң баштыңы Инна Монгуш, чагырга даргазы Айдыс Куулар, кожууннуң социал политика даргазы Джамиля Монгуш, кожууннуң өөредилге килдизиниң даргазы Айлаң Монгуш өөредилге болгаш профэвилел мурнундан чээрби ажыг кижини шаңнап мактаан.
Тыва Республиканың Херээженнер эвилели төлептиг активчи херээженнерни шаңнап мактаан. Людмила Кимовнаның кады ажылдажылга, чонче үнүүшкүн, демниг болуру деп чугаалаан чагыг-сөзүн чон үнелээн. Келген даргалар, аалчылар шуулганны бедик деңнелге эрткен деп үнелээннер. Хүндүлүг аалчыларывыска, сумуларның баштаар черлериниң удуртукчуларынга, киржикчилерге өөрүп, улуу-биле четтирдивис.
Уран СОНАМ, Тываның Херээженнер эвилелиниң Чөөн-Хемчикте куратору.
Авторнуң тырттырган чуруктары.
«Шын» №9 2025 чылдың март 13
