Тываның Баштыңы Владислав Ховалыг Москвага ажылчын сургакчылаашкын үезинде «Россеть» ПАН-ның чиңгине директору Андрей Рюмин-биле ужурашкан. Ужуражылганың түңнелдерин албан ёзузунуң блогунда дыңнаткан. Үлетпүр болгаш социал адырларда инвестиция төлевилелдериниң энергетика хандырылгазының комплекстиг планын боттандырары-биле холбашкан чугула айтырыгларны, ол ышкаш 2025-2026 чылдарның күскү-кышкы үезинге регионнуң четки комплекизин белеткээриниң амгы байдалын чугаалашканын республика Баштыңы демдеглээн.
«Энергетика системазының ажылын чүгле калбартыр эвес, а республиканың хоорайлар болгаш суурларын турум болгаш эки шынарлыг электри-биле хандырары – бистиң сорулгавыс ол» – деп, Владислав Ховалыг онзалап демдеглээн. Республика Чазааның «Россеть» компаниязы-биле үре-түңнелдиг кады ажылдажылгазының ачызында кышкы сезонга кыска үе иштинде белеткенип, энергетиканың шупту объектилериниң турум болгаш шынарлыг ажылдаарын хандырар аргалыг болганын ол чугаалаан.
Россия Федерациязының Чазааның Даргазының оралакчызы Александр Новактың бадылааны Комплекстиг планның күүселдези-биле «Россеть» компания регионда идепкейлиг ажылдап турарын сагындыраал. Бо чылын «Россеть» Тыва Республиканың энергетика инфраструктуразын хөгжүдеринче барык 15 млрд рубль хире акша-хөреңгини тускайлаан. Компанияның Сибирь федералдыг округта боттандырган улуг инвестиция программаларының бирээзи бо болур.
«Россеть» компаниязы 2025 чылда Тываның төп болгаш чөөн кожууннарын, ол ышкаш регионнуң найысылалын электри-биле хандырар 220 кВт күчүлүг “Туран” болгаш “Кызылская” дузалал станцияларын эде тудар дээн элээн каш улуг төлевилелдерни доозар.
Андрей Рюминниң дыңнатканы-биле алырга, улуг транзит шугумнарын тутпушаан, Тываның Хакасия-биле энергетиктиг харылзаазын быжыктырып, бүдүрүлге адырын хөгжүдеринге регионче немелде күчү-күштү дамчыдар арганы алыр. 130 муң ажыг чурттакчылыг Кызылдың чаа чуртталга комплекстерин болгаш школаларын чырык-биле хандырары – кол айтырыг.
Оон аңгыда келир кышка четки комплекизиниң белеткели септелге программазының күүселдезинден кол хамааржыр. Программаның акшаландырыышкыны 2024 чылга деңнээрге, 17 хуу өскен болгаш, 257 сая рубль четкен. Андрей Рюмин бадылаттынган графиктер ёзугаар ажылдар чоруп турарын демдеглээн.
Медээни болгаш чурукту ТР-ниң Чазааның парлалга албанындан алган.
“Шын” №36 2025 чылдың сентябрь 18