Бо кыш Тываның малчыннарынга болгаш кожуун-сумулар удуртукчуларынга езулуг-ла шылгалдалыг чыл болган. Кыш эгезинде улуг харның дүшкени, үргүлчүлелдиг сооктар база күштүг хаттар бергедээшкиннерни тургускан.
Чамдык кожууннарда харның кылыны ортумаа-биле 20–35, чер-черлерде 50 см четкен. Ол эрткен кыштарга деңнээрге, 5–10 см-ге кылын бооп турар.
Чамдык кыштагларже орук дуглаттынган. Ынчангаш Тываның Баштыңы Владислав Ховалыг малчын турлагларже орук-чирикти ажыдып, одар-белчиирни далбыйлаар ажылды организастаарын кыйгырган.
— Республиканың көдээ ажыл-агый эргелелдериниң дыңнатканы болза, бергедешкен аалдарже орукту хардан аштаар ажылдар чоруп турар. Таңды кожууннуң дөрт ажыл- агыйының баазазында база Чөөн-Хемчиктиң бир ажыл- агыйында мал чеминиң республика курлавырын тургускан, хереглелдиг кожууннарже ону чорудуп эгелээн. Ол ышкаш сиген-ширбиил, сула база оодурбаның курлавыры чедер, байдалды контрольда тудуп турар бис – деп, республиканың көдээ ажыл-агый сайыдының албан-хүлээлгезин күүседип турар Юрий Оруспай илеткээн.
Республика мал кыштаглаашкынын хүр-менди ажар дээш 277 муң тонна сиген-ширбиилди күзүн белеткээнин, амгы үеде 132 муң тонназы артканын сагындыраал. Республика курлавырында 340 тонна хоолулуг мал чеми, ооң санында 196 тонна сула, 144 тонна мал чиир холуксаа бар.
ТР-ниң Чазааның парлалга албаны.
Чуруктарны интернет четкизинден алган.
“Шын” №14 2024 чылдың февраль 24
