Бүгү-делегейниң херээженнер хүнүнүң бүдүүзүнде бүгү ниити өөредилгениң «Кыстың чаражы — ие кижиниң бүдүжүнде» деп аваларга тураскааткан хемчегге 6 муң ажыг иелер, улуг класстың өөреникчилери база студент кыстар киришкен.
Ук хемчегни «Сферум» платформа таварыштыр онлайн чурумга «ажык чугаа» хевирлиг эрттирген. Кыс уругнуң кижи болуп хевирлеттинеринге иениң ролюнуң база ава биле уруунуң аразында харылзаазының дугайында сүмележип чугаалажыры-биле, Тываның Камбы-лама эргелелинден, кожууннарның Херээженнер чөвүлелдеринден төлээлерни, Перинаталдыг төптүң гинеколог эмчизи Долаана Кууларны, ол ышкаш Тываның улустуң артизи Анзат Кууларны чалаан.
Олар ажы-төл кижизидилгезинге боттарының арга-дуржулгазы, төөгүзү-биле үлешкеннер, ол ышкаш кижизидилгеге аңгы-аңгы методикаларны болгаш аргаларны сайгарып чугаалашкан. Ада-иениң арга-мергежилин сайзырадыр талазы-биле специалистерниң эң эки практикаларын, сүмелерин база таныштырган.
«Бо хемчегниң киржикчилери медерелдиг, үре-түңнелдиг ада-ие болурунга дузалаар дыка хөй ажыктыг сүмелерни алган. Мындыг хемчеглер иелер аразында бот-боттарынга дузалажыр, деткижер каттыжылга тургузуп алырынга, ол ышкаш быжыг өг-бүлени тургузарынга дузалаар» — деп, хемчегниң организакчылары демдеглээн.
Кыс уругнуң кижи болуп тургустунарынга иениң ролю үнелеттинмес. Олар кыс уруунуң чуртталгазының бирги башкылары, дагдыныкчылары-дыр. Авалар уруунуң чүгле күш-шыдалының болгаш сеткил-сагыжының сайзыралынче кичээнгей салыр эвес, ооң талантызын сайзырадырынче база бодун хүндүлеп билир кылдыр деткиир ужурлуг.
Ооң-биле чергелештир ада-иелерни деткиир сорулга-биле эрттирген «Үлегерлиг ада-ие» биле «Тергиин ада-ие патрулю» деп мөөрейлерниң тиилекчилерин аңаа шаңнаан.
Национал школа хөгжүдер институттуң медээзинден алган.
“Шын” “ 18 2024 чылдың март 9
