Ооң мурнунда неделяга деңнээрге, Тывада чаа коронавирус халдавырындан аараан кижилер саны 56 хуу кызырылган. Росхереглелхайгааралының республикада эргелелиниң удуртукчузу Людмила Салчак февральдың 27-ден марттың 4-ке чедир COVID-19-тан аараан 132 таварылганы лаборатория бадыткаанын дыңнаткан.
Хүнде ортумаа-биле 20-30 аарыг кижи илереттинип турар. Сөөлгү хүнде 30 чаа таварылганы бүрүткээн. 203 аарыг кижи эмнээшкинде деп, регионнуң Кадык камгалал яамызы дыңнаткан. Республиканың стационар эмнелге черлеринде 58 кижи чыдар, үш кижиниң байдалы берге, 55 кижиниң байдалы – ортумак. Ийи кижини ИВЛ аппаратта кошкан. Хостуг орун фондузу – 58,5%.
Бөгүннүң байдалы-биле алырга, республиканың эмнелге албан черлеринде хууда камгалал чүүлдери база амбулаторлуг аарыг кижилер эмнээр эмнер четчир – деп, кадык камгалал сайыды Анатолий Югай дыңнаткан.
Аарыыр чоруктуң сан-чурагайы эвээжеп турза-даа, Тываның Баштыңының чогуур чарлыы-биле киирген кызыгаарлаашкыннарны ап кааптарының дугайында чугаалаары элек деп, республиканың эпидемиологтары санап турар. Республика девискээринде коронавирус халдавыры, ооң кракен чаа хевири чоруп турар, ынчангаш айыылдыг бөлүкке хамааржыр хоочу аарыгларлыг кижилер, бичии уруглар, иштиг херээженнер серемчилелди кошкатпазы чугула деп, Людмилы Салчак дыңнаткан.
«Ынчангаш санитарлыг-эпидемияга удур комплекстиг хемчеглерни, боттуң болгаш хөй-ниитиниң арыг-силиг чоруун сагыырын негеп турар бис. Маска кедерин ам-даа уламчылаар» – деп, Тываның кол санитар эмчизи чугаалаан.
Кызыгаарлаашкыннар ам-даа күштүг
8 марта 2023
58