Апрель 17-де Тыва Республиканың Дээди Хуралының (парламентиниң) үшкү чыыжының он дугаар сессиязының ээлчеглиг бешки хуралы болган. Сессияга чугаалашкан бир кол айтырыг “Шылгараңгай күш-ажылдың хоорайы” деп хүндүлүг атты тыпсырының дугайында болган.
«Кызыл хоорайга Россия Федерациязының “Шылгараңгай күш-ажылдың хоорайы” хүндүлүг атты тыпсырының дугайында Россияның Президентизи В.В. Путинге дилег дугайында» доктаалдың төлевилелин Кызыл хоорайның Төлээлекчилер хуралының даргазының оралакчызы Аяс Лопсан таныштырган.
«Шылгараңгай күш-ажылдың хоорайы” деп хүндүлүг атты тыпсырының дугайында 41 дугаарлыг федералдыг хоойлунуң 3-кү чүүлүнге дүүштүр Кызыл хоорайның Төлээлекчилер хуралы «Шылгараңгай күш-ажылдың хоорайы” атты найысылалга тыпсыр дугайында хоорайның хөй-ниити каттыжылгаларының база хамаатыларының саналдарын ТР-ниң Дээди Хуралынче киирген.
Ада-чурттуң Улуг дайынының үезинде Кызыл хоорайның чурттакчыларының фронтуга дузалаар талазы-биле киирген үлүг-хуузу улуг. Чижээлээрге, Кызылдың дааранылга комбинады дайынчыларга кышкы чолдак тоннар даараарын шиңгээдип алган, арга-арыг заводу — хаактар, алгы-кеш заво- ду — хаак багларын, кавалержи дериг-херекселдерни, кидис идиктерни болгаш сапогтарны бүдүрүп үндүрерин шиңгээдип алган. Дайын үезинде 52 муң эжеш хаакты, 10 муң чолдак алгы тоннарны, 19 муң эжеш чылыг хол-хаптарын, 16 муң эжеш кидис-идиктерни фронтуже чоруткан. Материалдыг дузаның ниити түңү 66,5 миллион рубль болган. Ынчангаш Кызылдың Төлээлекчилер хуралы Улуг тиилелгени чедип алыр дээш, чурттакчыларның киирген үлүг-хуузунуң ачызында «Шылгараңгай күш-ажылдың хоорайы” деп атты хоорайга тыпсыр дугайында айтырыгны көдүреринге барымдаа деп санап турар. Бо айтырыгга хамаарыштыр хамаатылардан 400 ажыг база албан организациялардан 112 дилег кирген, ону шуптузун доктаалда кошкан» — деп, Аяс Лопсан илеткээн.
Ээлчеглиг хуралга ТР-ниң Дээди Хуралының Төлээлекчилер палатазының даргазы Хонук-оол Монгушту база чалаан. Ада-чурттуң Улуг дайынының үезинде шупту ажылчы чон үлүг-хуузун киириштирген, а фронтуже Тывадан 800 муң баш мал-маганны дузаламчыга берген дээрзин ол айыткан.
Доктаалдың төлевилелин 28 депутат шупту деткээн. Ынчангаш шиитпирни чаңгыс үн-биле бадылаан. Дилег билдириишкинни чоокку үеде Россия Федерациязының Президентизинче чорудар.
Хуралга ниитизи-биле 32 айтырыгны көрген. Көдээ ажыл-агыйны сайзырадыр талазы-биле күрүне деткимчезиниң даңзызын калбартырының талазы-биле регионалдыг хоойлуну хүлээп алган. Ук даңзыда көдээ ажыл-агый продукциязы, чиг эт болгаш эки характеристикалыг аъш-чем бүдүрүп турар көдээ ажыл-агый бараан бүдүрүкчүлеринге деткимче кирип турар.
Ол ышкаш өскүс ажы-төл болгаш ада-иезиниң хайгааралы чок арткан уругларга социал деткимче талазы-биле немелде магадылалдар дугайында хоойлуга эдилгелерни сөөлгү номчулгада көрген. Өскүс уругларга болгаш тускай шериг операциязында киржип турар ада-иениң ажаалда-тежээлдези чок арткан уругларга чурттаар оран-сава-биле хандырар эргени, ол ышкаш чурттаар оран-сава орнунга ипотеказын дуглап болур азы чаа чурттаар оран-сава садып алыр акша төлевирин алыр немелде эргени тургузарын документиде быжыглаан.
2024 чылда Будда Шакьямуниниң төрүттүнген хүнүнүң байырлаар хүнүн тодараткан. Хүлээп алган доктаал езугаар байырлаар хүннү май 23-те кылдыр тургускан.
Тыва Республикада кижилерниң эргелериниң талазы-биле төлээзи Александра Адыгбайның 2023 чылда ажыл-чорудулгазының болгаш бо чылдың сорулгаларының дугайында илеткели-биле сессия хуралы доозулган.
Бистиң корр.
Чурукту ТР-ниң Дээди Хуралының социал четкиде арнындан алган.
“Шын” №30 2024 чылдың апрель 20
