Октябрь 10-да Тывадан «Кызыл кош» шимчээшкининиң делегациязы республикадан чорткан дайынчыларга чедирер дээн ачы-дуза чүъгү-биле Луганск хоорайда чеде берген.
Перронадан-на бисти тускай шериг операцияның эгезинден тура Тывадан барган дайынчыларның ада-иези дег чоок болу берген Луганскиниң пенсионерлери Иван Обрезанов биле Сергей Костриков уткуп алды. “Кызыл коштуң” активчилериниң кээр мурнуу чарыында Луганскиге Кызылдан чорткан ачы-дуза чүъгү чүдүрген машина чеде берген.
Республиканың эриг баарлыг чонунуң чыып белеткээн чүъгүнүң чартыын бистиң дайынчыларга дамчыдып бердивис. Олар төрээн чуртундан медээ дыңнап, чаңгыс чер-чурттуглары-биле ужуражыр дээш Ваня даайга чедип келгенер. Ийи дугаар ада-иези дег болу берген луганчылар Обрезановтар болгаш Костриковтарга төрээн дайынчыларывыстың мурнундан белектер - национал идик-хеп, суй-белектерни болгаш чигирзиг тыва чемнерни өг-бүлениң чылыг одаанга чыглып келгеш, сөңнедивис. Ол ышкаш ол өңнүктеривиске болгаш областьтың чагырга даргазы Александр Хлопонинге Тываның Баштыңы Владислав Ховалыг биле Күрүне Думазының депутады Шолбан Кара-оолдан өөрүп четтириишкин бижиктерин «Кызыл коштуң» активчилери тыпсып берген.
Тускай шериг операциязының даалгаларын күүседип турар оолдар, операцияның мурнукку одуруунда чоруп турар эштеринге чылыг хептер, таакпы, арыг-шеверге ажыглар чугула чүүлдер, тыва далган, хаан-шай, ааржы-курут, артышты чедирип бээр дээш чорупкан. Москвада чурттап турар бистиң чаңгыс чер-чурттугларывыс - сайгарлыкчылар Чейнеш биле Артём Ли өг-бүлениң мурнундан квадрокоптерни оолдарга хүлээдип бердивис.
Ол ышкаш 55 даг-адыгжы бригадазындан бистиң оолдар болгаш өске-даа кезектерден дайынчыларны бөгүн тыва хой эъди болгаш манчы-биле өөртүр бис.
Луганскиден бистиң медээлеривисти көрүп туруңар.
Тускай шериг операциязында киржип турар Тывадан барган дайынчыларны деткииринге ачы-дуза чыылдазын организастажып, үлүг-хуузун киирген бүгү чонга четтиргенивисти илередип тур бис.
Наталья Черноусова. "Твой информ" солуннуң кол редактору.
