Сан-чурагайлыг бедик информастыг технологияларны нептередириниң, информастыг технологияларның билиглерин шиңгээдип алырынга чурттакчы чонга дузалаарының «IT-Garage» угланыышкынныг IT-коворкинг-төп Кызыл хоорайда ажыттынган. Бо төптү дерип тургузарынга “Биче болгаш ортумак бизнести” деткиир федералдыг программаның акша-хөреңгизин чарыгдаан.
Күзелдиг кижилер IT-технологияларның билиглерин шиңгээдип алырынга болгаш боттарының идеяларын боттандырарынга херек дериг-херекселдер-биле бо төп бүрүнү-биле дериттинген. 12 кижи хары угда информастыг технологияларга өөренириниң лекториязы IT-коворкинг-төпте бар. Бо лекторияга чурттакчы чоннуң компьютерге билиглерин бедидер талазы-биле өөредилгени, информастыг технологиялар дугайында лекцияларны, бедик технологияларга ханы билиглиг специалистер-биле ужуражыышкыннарны эрттирер. Улуг кичээнгейни школачыларның болгаш аныяк оолдар, уругларның информастыг технологияларга профессияларны шилип алырынче угландырар.
Тывага бедик информастыг технологияларның девискээрин алгыдар талазы-биле элээн улуг ажылдарны республиканың харылзаа ажылдакчылары чорудуп, харылзааның эки шынарлыг каналдарын болгаш информастыг медээлерни сайгарар төптерни тургусканын сан-чурагайлыг хөгжүлде сайыдының оралакчызы Иосиф Көрген-оол демдеглеп, «IT-Garage» угланыышкынныг IT-коворкинг-төптү Кызыл хоорай ажытканы база бир бурунгаар базым-дыр деп чугаалаан. Ооң бодалы-биле алырга, чогум-на мындыг төптерге амгы үениң бичии болгаш аныяк салгалдары бедик информастыг технологияларны шиңгээдип ап, алызы барып боттарының идеяларын концепция кылдыр ажылдап кылып, бети дизе, биче хемчээлдиг продукция деңнелинче үндүрүп болур.
Кызылда IT-коворкинг-төпке информастыг билиглерни («IT-Гараж») азы өөредилге болгаш билиглер бедидериниң угланыышкынынга колдады чорудар. Угланыышкынны «IT-Garage» деп адаан ужуру баштайгы IT-специалистер информастыг билиглерни гаражтарга өөренип ап турганы-биле холбаалыг.
"Шынның" корр.
В. Иргиттиң чуруу