Тывада чуртталга тудуунуң темпизи бедик хевээр артпышаан. Кызыл хоорайда «Столичный» чуртталга комплекизиниң хөй аал чурттаар ийи бажыңының ажыдыышкыны бо хүннерде болуп эрткен. Республиканың Баштыңы Владислав Ховалыг квартираларның дүлгүүрлерин чаа чурттакчыларга тывыскан. «Восток» компаниязы чуртталга микрорайоннарын тудар улуг хемчээлдиг инвестиция төлевилелин дидим боттандырып эгелээн болгаш, бо бүгүнү үезинде шынарлыг, чараш кылдыр тудуп билирин бадыткаан»– деп, Баштың демдеглээн.
Тывага 2 хуулуг ипотека чээлизиниң чиигелделиг хуусаазын узадыр дээн республиканың эгелээшкинин чурттуң Президентизи Владимир Владимирович Путинниң деткээнинден республикада чуртталга тудуу калбарган деп регионнуң удуртукчузу демдеглээн. Чаа бажыңнарда квартираларның 90 ажыг хуузун чиигелделиг ипотека-биле саткан. Чамдык садып алыкчылар тудуг черинден немелде чиигелделерни ажыглаар аргалыг болган.
Чүгле бо чылын 2 хуу чиигелделиг ипотека программазынче 4 муң ажыг билдириишкин кирген, ооң 49 хуузунга чөпшээрелди берген. Ол-ла программа-биле 2025 чылда 812 өг-бүле бажыңналган.
«Бо бистиң бир дугаар квартиравыс, бир дугаар ипотекавыс. Чиигелделиг ипотека дузазы-биле өг-бүлелер чурттаар оран-сава садып алыр аргалыг болганынга канчаар-даа аажок өөрүп тур бис» – деп, бажыңның чаа чурттакчызы Виктория Монгуш өөрүшкүзүн илереткен.
Бажыңнарда квартираларның шөлдери аңгы-аңгы– студиядан эгелээш, үш өрээлге чедир. Амгы үениң негелделеринге дүүштүр бүрүн чаагайжыттынган: уруглар ойнаар айыыл чок болгаш өңгүр шөлдүг, автотранспорт тургузар черлерлиг, сиген тараан девискээрлиг чуртталга комплекизин планнаан үезинден мурнай дужааган. Оон аңгыда бажыңның девискээринде чырып турар фонтанны кылган.
"Бис 2023 чылдың декабрьда чиигелделиг ипотеканы алган бис. Шупту чүвеге дыка таарзынып тур бис. Мындыг чуртталга комплекизинге чурттаарывыска дыка өөрүп тур бис. Фонтан, уруглар ойнаар шөл дээш шупту чүве дыка эки-дир" – деп, Чета Донгак чугаалаан.
«280 квартира ээлериниң аразында, амгы үеде Төрээн чуртун камгалаар ыдык хүлээлгени күүседип турар тускай шериг операциязының киржикчилери база бар. Ада-чурт камгалакчызының чылында Тускай шериг операциязының маадырлары аттыг кудумчуда чаа чуртталга бажыңнарын дужаап турарывыс ханы уткалыг: бо кудумчуга ойнап өскен оолдар, уруглар төрээн кудумчузунуң адын, «эрес-дидим чорук», «Ада-чурт» база «маадырлыг чорук» дээн ышкаш үнелиг чүүлдерни угаан-медерелинге кезээде кадагалап арттырар» — деп, республиканың Баштыңы Владислав Ховалыг демдеглээн.
Чыжыргана СААЯ белеткээн.
Чиңгис СААЯНЫҢ тырттырган чуруктары.
“Шын” №34 2025 чылдың сентябрь 4
