Республикага 159 хүндүскү, 19 стационар болгаш 1 майгынныг лагерь ажылдаар. Амыдыралы берге байдалда уругларның чайгы дыштанылгазын организастаарынче 50 ажыг сая рубльди угландырган. 2023 чылга деңнээрге, барык 6 сая рубль хөй. Ол дугайында Тываның Баштыңы Владислав Ховалыг дыңнаткан.
“Тываның чайгы лагерьлеринге тускай шериг операциязының киржикчилериниң ажы-төлү, эвээш хөреңгилиг, хөй ажы-төлдүг болгаш долу эвес өг-бүлелерниң уруглары, өскүстер болгаш ада-иезиниң хайгааралы чок арткан, кадыы кызыгаарлыг уруглар төлевир чок дыштанып болур. Чиигелделер назы четпээннерниң хайгаарал чок чоруун болгаш кем-херек үүлгедиишкиннерин болдурбазының учёдунда турар уругларга база хамааржыр” – деп, регионнуң удуртукчузу чугаалаан.
Стационар лагерьлерниң девискээринде бо хүннерде септелге ажылдары эгелей берген. Июнь ай чоокшулаарга, акарицидтиг арыглаашкын эгелээр. Лагерь ажылдакчылары эмчи комиссиязын эртип, башкылар кижизидилгениң чидиг айтырыгларынга хамаарышкан тематиктиг семинарларже барып турар. Ол ышкаш сезон бүрүзүнүң планын тургузар ажылдар база эгелей берген.
Оларның бирээзи “Байлак” лагеринде 1970 чылдан тура ажылдап турган эрги клуб оран-савазын бускаш, ооң орнунга чаа медицина пунктузун май айның ортузунга чедир тудуп доозар сорулга салдынган.
Тудуг ажылдарын Тыва Республиканың Күш-ажыл болгаш социал политика яамызының удуртулгазының адаанда 14 албан чери кылып чорудуп турар. Бодунуң ээлчээнде олар “Байлак” лагериниң ажылын организастаар бөлүк ажылдакчыларны чыып, ажылды үе-шаанда кылып доозарынга эргежок чугула дериг-херекселдер-биле хандырар.
Чыжыргана СААЯ.
Чурукту интернеттен алган.
«Шын» №31 2024 чылдың апрель 24
