ТР-ниң Баштыңы Владислав Ховалыг «Ынакшыл болгаш шынчы чорук дээш» деп медаль алган өг-бүлелер-биле байырлыг байдалга ужурашкан.
25-тен хөй чылдар бурунгаар өг-бүле туткаш, бот-боттарынга ынакшылды болгаш шынчы чорукту бадыткап, аныяк-өскенге езулуг өг-бүлениң үлегерин көргүскеш, төлептиг ажы-төлдү өстүрүп, кижизиткен өг-бүлелер ол хемчегге келген.
Өг-бүлелер аныяк чорааш, канчаар таныжып алганының дугайында солун ужуралдарны сактып, бичии күрүнезиниң үр чылдарда аас-кежиктиг чуртталгазының чажыттары-биле үлешкен. Оон аңгыда, өг-бүлениң үнезиниң дугайында болгаш салгалдарга быжыг өг-бүле тударының чажыттарын канчаар чедирериниң дугайында чугаалашкан.
РФ-тиң Президентизи Владимири Путинниң Россияга чарлааны Өг-бүле чылы деп тускай программазының ачызында республиканың чеже-чеже найыралдыг, ажылгыр-кежээ, хөй ажы-төлдүг, чаагай чаңчылдарын сагып чоруур өг-бүлелери илерээн дээрзин ТР-ниң Баштыңы Владислав Ховалыг демдеглээш, хемчегге келген өг-бүлелерге байырын чедирген.
Бистиң корр.
Буян ООРЖАКТЫҢ тырттырган чуруктары.
“Шын” №51 2024 чылдың июль 10
