«Президентиниӊ спортчу оюннарынга» — Бүгү-российжи школачыларныӊ спортчу маргылдаазынга шупту регионнарныӊ школачыларыныӊ командалары киржип турар. Ол спорттуӊ он бир аӊгы хевиринге болур. Тодаргайлаарга, хол бөмбүү, баскетбол, чиик атлетика, стол теннизи, спортчу туризм, уг-шиин тыварынга болгаш мини-футбол, самбо, регби, эштири, гандбол.
2023 чылдыӊ Президентиниӊ спортчу оюннарыныӊ маргылдаалары Анапа хоорайда «Смена» Бүгү-российжи уруглар төвүнге сентябрь 22-27 хүннеринде болуп эртер.
Тываныӊ школачыларыныӊ командазы самбо маргылдаазынга киришкеш, 10 медальды чаалап алган дээрзин республиканыӊ Өөредилге яамызы дыӊнадып турар.
Мөӊгүн медальды Начын Моӊгуш (58 кил), Дамба Моӊгуш (64 кил), а уруглар аразынга Айза Саая (59 кил) чаалап алганнар.
Хүлер медальга Баир Саая (58 кил), Ильяс Захаров (64 кил), Евгений Оолак (49 кил), Долгармаа Саая (50 кил), Падма Доӊгак, Пема Куулар, Лиана Кара-Сал төлептиг болганнар.
Школачыларныӊ кадыкшылын быжыктырып, күш-культура болгаш спорт кичээлдерин системажыдып, уругларны спортка чаӊчыктырып, бүгү тала-биле сайзыраӊгай болурунга өөредип-кижизидер сорулга-биле ук хемчегни организастаан. Оон аӊгыда, спортка салым-чаяанныг уругларны илередир, школаныӊ спортун сайзырадыр талазы-биле муниципалдыг тургузуглар аразынга кады ажылдажылганы чорудар.
2022 чылда Президент маргылдааларынга «Россия Федерациязыныӊ Президентизиниӊ Кубогу» деп эрге-байдалды албан ёзузу-биле тывыскан.
Р.Демчик белеткээн.
Чуруктарны интернеттен алган.