Чоокта чаа ТР-ниң Баштыңы Владислав Ховалыг чонну дүвүредип турар чидиг айтырыгларга харыыларны дорт дамчыдылгага берген. Оларның бирээзи Кызыл хоорайның 14 дугаар школазының салым-чолу болган. Ук айтырыгга хамаарыштыр ол бодунуң блогунга:
«Кызыл хоорайның 14 дугаар школазы дээш дүвүреп турар чонну билип тур мен. Тывада туттунуп турар 11 школаның бирээзи найысылалда «Мөңгүн» микрорайонунга эрги 14 дугаар школаның турган черинге туттунар дээрзин сагындырган мен. Тус черде тудуг ажылы кандыг чоруп турарын хынап четтим.
Келир чылдың төнчүзүнде школа тудуу доостур дээрзин тудугжу аазады. Школаның кол өзээниң тудуу 80 хуу боттанган. 3 дугаар каътты тудуп үндүрүп турлар. Бо чылдың октябрьда спорт залдың кол ажылдары доостур. Ажылчын холдар четчир, ажыл өй-тавында, тура дүшпейн чоруп турар дээрзин тудугжу демдегледи. Ук школаның тудуунда барык 80 кижи хаара туттунган.
2027 чылда «Мөңгүн» микрорайонунуң тудуу адакталыр. Ынчан бо чаа школа «Мөңгүннүң» төвү апаар. Ийи кварталдың тудуу чайны өттүр элээн шуудай берген-дир. Хөй квартиралыг чеди бажың деңге туттунуп турар. Оларның тудуунуң кол өзээниң 50 хуузу болу берген. Удавас база бир хөй квартиралыг бажыңның таваан салыры планда көрдүнген. Инвестор хүлээнген төлевилелинге кончуг шыңгыы хамаарылгалыг, шалыпкын ажылдап турары кончуг эки-дир» - деп, демдеглээн.
А.ОНДАР белеткээн.