Чаңчыл болган кожууннарның шаңналы дээш тыва хүреш маргылдаазын Чөөн-Хемчик кожуун ээлчег аайы-биле 86 шыырак мөге аразынга "Сүбедей" спорт ордузунга бедик байдалга эрттирген.
Маргылдааның ажыдыышкынынга Чөөн-Хемчик кожууннуң чагырыкчызы Алага Ондар база Тываның Баштыңы Владислав Ховалыг сөс ап чыылганнарга база ТШО-нуң киржикчилеринге Ада-чурт камгалакчыларының хүнү-биле байырны чедиргеннер. Хүреш үезинде ТШО-нуң киржикчилери хүрежип турар мөгелерни деткип, 10 муң акшаны шүүлген мөгеге деткикчилээннер.
Маргылдааның түңнелинде, Хартыга мөге Начын-Мерген Ооржак шүүлген (Сүт-Хөл), кожуун чергелиг Начын мөге Демирхая Самдан үжүүрлешкен (Улуг-Хем), 3–4-кү шаңналдыг черде ТШО-нуң киржикчизи Менги Монгуш (Чөөн-Хемчик), Аңчы Ооржак (Сүт-Хөл), 8 шыырак мөге аразынче: Эчис Монгуш (Кызыл хоорай), Начын мөге Баасан Баткар (Эрзин), Начын Хомушку (Барыын-Хемчик), Аян Саая (Барыын-Хемчик) киргеннер. Шаңналдар: шүүлген мөге 35 муң рубль, үжүүрлешкен мөге 20 муң, 3-кү, 4-кү чер дээш 15 муң рубль, 5-тен 8 чедир 10 муң рубль болган.
Сөөлгү үеде деткикчилер демнии-биле тыва хүреш мөгелерин чараш хүрежи дээш шаңнап-мактап турары улуг чоргаарал.
Алексей Чамбал-оол.
“Шын” №15 2024 чылдың февраль 28
