Чеди-Хөл кожууннуң төвү Хову-Аксында «Дюймовочка» уруглар садынга «Мөзү-шынарның мөңге дүрүмнериниң үндезиннери база келир үези» деп темага уруглар садының бүгү ада-иелеринге хурал болган.
Аңаа Чеди-Хөл кожууннуң чагырга даргазының оралакчызының хүлээлгезин күүседип турар Н.Б. Монгуш, Өөредилге эргелелиниң даргазының хүлээлгезин күүседип турар Б.В. Бюрбю, уруглар садтарының ажылының талазы-биле методизи С.М. Сундуй база Өөредилге эргелелиниң өске-даа специалистери аалдап четкен.
Уруглар садының коллективи чыылган ада-иелерге болгаш ада-иелер комитединиң төлээлеринге кайгамчык улуг программаны белеткээн. Ол ышкаш уруглар садының кижизиттирикчилери ада-иелерге болгаш келген аалчыларга боттарының салым-чаяанын көргүзүп, концертти бараалгаткан.
Сагыш-сеткил болгаш мөзү-шынар кижизидилгезиниң дугайында уруглар садының эргелекчизи А.А. Ондар илеткээн. Өг-бүле – уругнуң хевирлеттинип келир үндезини дээрзин ол демдеглээн. Кол кижизидикчи башкы Е.К. Тюлюш ада-иелер-биле ажылының планын таныштырган.
Кижизидилге адырында ада-иениң үлүг-хуузу улуг болганда, Тыва Республиканың эр кижилерниң сагыыр ыдыктыг дүрүмнери база Тываның иелериниң ыдыктыг сагылгаларын тайылбырлап көргүскени кончуг ажыктыг болган.
Үннер адалгазын сайзырадырынга ажыктыг мергежилгелерни болгаш сүмелерни ада-иелерге таныштырган. Ада-иелер боттарының сонуургаан айтырыгларын кижизидикчи башкыларга салып, чогумчалыг харыыларны алганнар.
Кижизидикчи башкы Р. М. Оюннуң "Ажы-төлдүң кижизидилгези - тыва өг-бүлениң амыдыралының кол өзээ" деп темага кылган илеткели ада-иелерниң сонуургалын оттуруп, кончуг ажыктыг болган.
Хуралдың төнчүзүнде чыылган ада-иелерге оюнну ойнадып, уруглар садының ажылын болгаш хуралды түңнээр анкетаны чоруткан. Эң-не кол чүүл – өөредилге чылының дургузунда ада-иелер болгаш кижизидикчи башкыларның аразында сырый харылзаалыг ажылын быжыктырар сорулга-биле ада-ие комитединиң даргазын болгаш кежигүннерин шилээн.
