Аян Оюн бүдүжүнден биче сеткилдиг, эш-өөрзүрек, идепкейжи кижи чораан. Ол 1998 чылдың август 16-да Кызыл хоорайга төрүттүнген. Аян 2007 чылда школаның эргинин артап, 1-ги классче кирген. Өөренип чораан чылдарында ол класстың даргазы, спортчузу, шупту чүвени удуртуп-баштап, эвилелдеп билир онзагай бүдүжү-биле эш-өөрүнүң болгаш башкыларының идегелин, хүндүткелин чаалап алган. Аянның чугаакыры, оюн-баштаа, эвилең-ээлдээ, улуг-биче кижилер-биле чугаалажып билири черле кайгамчык кижи чораан. Мен ооң клазының удуртукчу башкызы болгаш Аянга идегээр, бүзүрээр турган мен. Школаны 2016 чылда дооскаш, Кызылдың экономика болгаш эрге-хоойлу техникумунче киргеш, аңаа кондитер-повар мергежилди чедип алган. Кол өөредилгезинден аңгыда, Республиканың немелде өөредилге төвүнге “Чалыы турист-краевед” деп программага база өөренип алыр аргалыг болган. 2019 чылда техникумну доозупкаш, Соңгу флоттуң Мурманск облазында Североморскунуң 08275-200-кү шериг кезээниң Кутузов орденниг бригадазынга шериг албан-хүлээлгезин эрттирген.
Шериг албан-хүлээлгезиниң хуусаазы төнгенде, 2020 чылдың июнь 3-те, шериг керээзин чарып, шериг томуйлаашкыны-биле демир-орук кранының техниктиг салбырының моторизи болган. Ол керээни эртип тургаш, Волгоград хоорайга мергежилинге өөредилгени эрткен. Тускай шериг операциязы эгелээнден тура дайынчы зоналарже сургакчылап чоруп турган. Аян Юрьевич “Дайынчы хөделиишкиннер хоочуну” деп аттың эдилекчизи.
Дайынчының шаңнал-макталдары хөй: “Эрес-дидим чорук” хөрек демдээ, “Дайынчы шылгарал дээш” медальдың II чергези, Суворов медалы, Луганскының демир-орук начальнигиниң Хүндүлел бижии, 10662 дугаар шериг кезээниң командири А. Бариновтуң Хүндүлел бижии дээш оон-даа өске.
2025 чылдың март 21-де дайынчы хүлээлгезин күүседип тургаш, Донецк Улус Республиканың Красноармейск районда Жёлтое суурну хостажып тургаш, шавар халдаашкын үезинде эш-өөрүн камгалаар дээш, “Баба-Яга” дээр эң күштүг, коргунчуг частыышкынга таварышкаш, маадырлыы-биле мөчээн.
РФ-тиң Президентизи В. Путинниң 2025 чылдың июль 19-та үнген Чарлыы-биле Аян Юрьевич Оюнну дайынчы даалгазын күүседип тургаш эрес-дидим маадырлыг чоруу дээш, мөчээниниң соонда “Эрес-дидим чорук” ордени-биле шаңнаан. Маадырның иези — Лидия Алексеевнага төлептиг оолду кижизидип өстүргени дээш өөрүп четтириишкин бижиктерин хөйү-биле тывыскан.
Дайынчының бичии кызы Вика Аяновна Кызылдың 2 дугаар национал школазының 3 “б” класстың өөреникчизи.
Ада-чуртун камгалап тургаш, 26 харлыында, хып дээн аныяк назынында чырык өртемчейден, чоок кижилеринден кезээ мөңгеде чарлып чоруткан Маадырывыстың чырык ады, овур-хевири бистиң чүректеривиске кезээ мөңгеде артар.
Раиса ОНДАР, Тываның улустуң башкызы, РФ-тиң Журналистер, ТР-ниң Чогаалчылар эвилелдериниң кежигүнү.
Чурукту авторнуң архивинден алган.
“Шын” №44 2026 чылдың ноябрь 12
"Шын" солуннуң МАХ-каналынга каттыжыңар: max.ru/channel_shyn