Август 23-те Тыва Республиканың “Ада-чурт камгалакчылары” күрүне фондузунга Тускай шериг операциязының хоочуннарының ассоциациязын республикага тургусканының дугайында дыңнадып, ооң баштайгы кежигүннеринге шынзылгаларны тывыскан.
Кандыг-даа дайынга киришкен оолдар чер-чуртунга чанып келгеш, бот-боттарын деткижип, дузалажып чоруур дээрзин Дээди Хуралдың депутады Эрес Хуурак демдеглээн:
“ТШО дайынчыларының ассоциациязы чүгле боттарынга эвес, өг-бүлелеринге база дузалажыр. Ылаңгыя хөй ажы-төлдүг хоочуннарга ол кончуг ажык-дузалыг болур. Ынчангаш дайынчыларывысты бүгү талазы-биле деткип, дузалажыр бис. Тиилелге канчаарга-даа бистиң талавыста болур”.
Республикада мындыг хевирлиг каттыжыышкыннар элээн хөй дээрзин чаа тургустунган ассоциацияның удуртукчузу, 55-ки гвардейжи мото-адыгжы (даг) бригаданың офицери Мөңге Тагба чугаалаан:
“Бис маңаа дайынчы эш-өөрүвүстүң болгаш оларның өг-бүлелериниң эрге-ажыын камгалаар, оларга дузалажыр дээш, хөй-ле ажылды демнежип кылыр бис. Оон аңгыда, дайын шөлүнге бажын салган эш-өөрүвүстүң ат-сывын мөңгежидип, аныяк-өскенге патриотчу кижизидилгени чорудар бодалдыг бис”.
“Ада-чурт камгалакчылары” күрүне фондузунуң удуртукчузу Мерген Кызыл-оол каттыжыышкынның баштайгы кежигүннеринге болгаш ооң удуртукчузунга байырын чедирбишаан, ооң кежигүнү болурунуң харыысалгазын тайылбырлаан:
“Бо шынзылгалар анаа эвес, кончуг улуг харыысалганы илередип турар. Ооң артында тыва чонувус, чоок кижилеривис, оларның өг-бүлелери, ажы-төлү, кады кырыырлары, ада-иези бар. Оларның мурнунга силерниң деткимчеңер, ачы-дузаңар, буянныг хамаарылгаңар аажок улуг деп санап тур мен”.
Ол ышкаш кончуг берге дайынчы байдалды көрүп, кежинге эрткен соонда, сагыш-сеткил талазы-биле аскай берип болур. Ооң уламындан шын эвес орукче кирериниң айыылы бар. Кирип-даа турарлар бар. Оларның-биле ажылды чорудуп, багай чаңчылдардан адырып, шын орукче киреринге дузалажыр ажылды база чорударын ол демдеглээн. Аарыг-аржык арткан ТШО киржикчилерин кадыын быжыктырып, янзы-бүрү клиникаларже чорудуп, эмнээшкин алырынга дузалажыры база ассоциацияның кылыр ужурлуг сорулгалары-ла хөй.
Чыжыргана СААЯ.
“Шын” №64 2024 чылдың август 24
