Өрт айыыл-халавын өжүрүп турар үеде амы-тынындан чарылган маадырлыг тыва өрт өжүрүкчүлеринге тураскааткан езулал болуп эрткен.
“Арга-арыг өрттери-биле демиселге амы-тынындан чарылганнарга мөңге алдар” деп тураскаалда албан-хүлээлгезин күүседип тура, амы-тынындан чарылган парашютист, десантник өрт өжүрүкчүлери болгаш хайгааракчы ужудукчуларның аттарын сиилбип мөгежиткен.
10 чыл бурунгаар июнь 6-да Бай-Тайга кожуунга Кара-Хөл чоогунга бедик черге тайга өртүн өжүрүп турган үеде сес камгалакчы өрт өжүрүкчүлери амы-тынындан чарылган. Оларның эң-не аныяа – 22, а эң-не улуу 36 харлыг турган.
Ол хүн хенертен хат хадып, чаңныктыг чаъс-чайык эгелээн турган, ынчангаш арга-арыгның адаанга хып турган от ыяштар баштарынче дамчый берген. Авиасалбырның өрт өжүрүкчүлери от-чалбырааш дээрбээнге барганнар.
Тывага өрт өжүрер буянныг үүлеге амы-тынын харамнанмаан өске маадырларны база утпаза чогуур. 2012 чылда Элегес арга-арыг ажыл-агыйынга эки турачы өрт өжүрүкчүзү Борис Кара-оолович Оюн база от халавы-биле дең эвес демиселге амы-тынындан чарылган. 1996 чылда Бии-Хем кожуунга өрт өжүрүп тургаш, Туранның арга-арыг ажыл-агыйының 7 лесниги база мөчээн турган.
Сактыышкын езулалдың киржикчилери өрт өжүрер буянныг үүлеге амы-тынын харамнанмаан маадырларга тураскаадып, бир минутаның ыржымын чарлаан.
“Бис оларны сактып, шак ындыг болуушкуннар катаптаттынмас кылдыр ажылдаар ужурлуг бис. Өрт кижилерниң от-биле оваарымча чок хамаарылгазындан өөскүп үнген, ооң түңнелинде бистиң дайынчыларывыс амы-тынындан чарылган. Чонувустан от-биле оваарымчалыг болурун дилеп тур бис” – деп, Тываның арга-арыг ажыл-агыйы болгаш бойдус хүрээлел сайыды Темир Сарыг-Хаа чугаалаан.
2012 чылдың июнь 6-да өрт-халап-биле демиселге амы-тынындан чарылган маадырларның аттары:
Былев Николай Владимирович,
Кечил-оол Владимир Владимирович,
Кызыл-оол Херел Юрьевич,
Новиков Николай Николаевич,
Стремоусов Виктор Евгеньевич,
Федотов Сергей Сергеевич,
Хуурак Радион Юрьевич,
Шилин Андрей Олегович.
Бистиң корр.