Украинада Россияның чорудуп турары тускай дайынчы операция үезинде эрес-маадырлыг чоруун көргүзүп, амы-тынындан чарылган дайынчыларга тывыскан “Мужество” орденнерни оларның өг-бүлелеринге тыпсырының ээлчеглиг ёзулалы Тываның Дээди Хуралының хуралдаар залынга болуп эрткен.
Тускай дайынчы операция үезинде эрес-маадырлыг чоруун көргүзүп, амы-тынындан чарылган анаа дайынчылар Соян биле Дмитрий Дивииге, матрос Кайгал-Маадыр Сатка, гвардия ефрейтору Шолбан Хертекке болгаш улуг прапорщик Александр Ооржакка “Мужество” орденнерни Россияның Президентизиниң Чарлыы-биле тывыскан.
ТДО үезинде эрес-маадырлыг чоруун көргүзүп, амы-тынындан чарылган анаа дайынчы Чингиз Чонданга “За отвагу” медальды болгаш “Мужество” орденни тывыскан, биче сержант Алдын Амырдага “ТДО-нуң киржикчизи” медальды болгаш “Мужество” орденни тывыскан.
Украинада Россияның чорудуп турары тускай дайынчы операция үезинде амы-тынындан чарылган дайынчыларның шаңналдарын өг-бүлелеринге тыпсырының мурнунда Дээди Хуралдың Даргазының оралакчызы Виктор Глухов, Тываның Баштыңының ТДО талазы-биле тускай төлээзи Тимур Куулар, республиканың шериг комиссарының оралакчызы Андрей Басенков олар Тываның хөй национал чонунуң мурнундан тускай дайынчы операция үезинде амы-тынындан чарылган дайынчыларның төрелдеринге болгаш чоок кижилеринге ханы кажыыдалды илереткеннер. Оларның оолдарының маадырлыг чоруун Россияның болгаш Тываның чурттакчылары кажан кезээде утпас дээрзин демдеглээннер.
/ ТР-ниң Дээди Хуралының парлалга албаны.
