«Маадырларның үези» – тускай шериг операциязының киржикчилеринге сайзырал программазы. Ол дээрге ТШО киржикчилериниң аразындан күрүне органнарынга болгаш муниципалдыг эрге-чагыргага, ол ышкаш күрүне компанияларынга ажылдаар удуртукчуларны белеткээр өөредилге программазы-дыр. Бирги тест хевиринге эрткен шылгалдага Тывадан дөрт шериг албанныглар киришкен. Дараазында чадазында шериглерни өөредилге манап турар.
Ук программаның киржикчизи Сайыр-Даш Середар Президент Владимир Путинге өөредилгелиг программа дээш өөрүп четтиргенин илереткен: «Россияда шыырак билиглиг оолдар хөй. Чазаавыс болгаш Президентивис биске дузалап турары эки-дир. Бо берге үеде «Маадырларның үези» деп мындыг төлевилелди тургусканы дээш четтиргенивис илередип тур бис. Дыка өөрүнчүг-дүр!».
Сайыр-Даш — тулчуушкуннар хөделиишкиннериниң хоочуну, хөй ажы-төлдүг ада. Ол 2014 чылда Сибирьниң аргыжылга оруктарының күрүне университединиң «Реклама болгаш хөй-ниити-биле харылзаа» деп мергежилин дооскан, юриспруденция талазы-биле чаа квалификацияны эрткеш, муниципалдыг администрацияга туризм айтырыгларын харыылап турган.
Ол мобилизастаашкын соонда Авдеев угланыышкынынга шериг албанын эрткен. Курлавырда дайынчы эрткен чылдың декабрьда ажы-төлүн болгаш азырап алган ийи дуңмазын кижизидип өстүрер дээш чанып келген.
Ук программага ийи чыл өөренир. Ол программаның ачызында республиканың чаагай чоруу дээш мергежилиниң аайы-биле ажылдаар аргалыг болганын Сайыр-Даш демдеглеп турар.
Программаның тест хевирлиг шылгалдазын эртеринге «Ада-чурт камгалакчылары» регионалдыг фондудан куратору дузалашкан. Дайынчының чугаазы-биле алырга, шылгалданы эртери берге эвес болган, ооң түңнели май 20-де билдинер.
«Ада-чурт камгалакчылары» фондунуң ачызында кураторларывыс бисти шын орукче уштап-баштады. Оларның деткимчези дээш өөрүп четтирдивис» — деп, дайынчы чугаалаан.
А. СОЯН белеткээн.
«Шын» №33 2024 чылдың май 4
