Бо хонуктарда Тываның Баштыңы Владислав Ховалыг тускай шериг операциязының киржикчилери-биле ужуражып тура, Президент Владимир Путинниң инициативазы-биле чуртта эгелээн «Маадырларның үези» программага киржириниң дугайында чугаалашкан. Республиканың удуртукчузу холунда ок-боолуг тулчуп чораан кижилерден күрүне органнарынга, муниципалдыг албанга база күрүне компанияларынга ажылдаар бедик мергежилдиг болгаш ханы билиглерлиг удуртукчуларны белеткээр программага киржирин шериг албанныгларга сүмелээн.
Ужуражылганың киржикчилери болур амгы үеде шериг албанныглары база дайынчы хөделиишкиннер хоочуннары мындыг программаны тургусканы дээш Президентиге четтиргенин илередип, аңаа киржиринге беленин чугаалаан.
Күрүне удуртуп-башкарылгазының дээди школазының стандарттары ышкаш өөредилге программазынга «Губернаторлар школазы» удуртукчуларны белеткээрин Владислав Ховалыг чугаалаан. Бодунуң үезинде Баштың база аңаа өөренген. Россияның Чазааның, Президент Администрациязының, федералдыг яамылар, ведомстволар удуртукчулары, регионнар болгаш улуг компаниялар баштыңнары программаның бирги киржикчилериниң дагдыныкчылары апаарын Президент чугаалаан.
Апрель 8-ке чедир времягероев.рф төлевилелдиң тускай сайтызынче киргеш, программага киржир чагыгны бээр. Бүрүткел эрткен киржикчилер Россияның улус ажыл-агый болгаш күрүне албаны академиязының шөлүнге онлайн-өөредилгени алыр. Дараазында шилилгени эрткеннер, «Сенеж» күрүне удуртуп-башкарылгазының дээди школазының программазынга өөренир.
Шериг албанныглар, керээ-биле шериг албанын эрттирип турарлар, мобилизация-биле кыйгырткан Россия Федерациязының хамаатылары, ол ышкаш удуртур ажылдарга база хамааты ажылдарга ажылдаан эки турачы кезектерде шериглер программага киржир.
Программага киржир чагыгларны Тыва Республиканың шериг комиссариадының электроннуг почтазынче – vktiva_1@mil.ru азы бо адресче чорудар: Кызыл хоорай, Абаканская кудумчузу, б. 45, тайылбыр алыр телефон: 8-394-22-3-08-20.
«Шын» №22 2024 чылдың март 23
