Май 11-ниң хүнүнде Сүт-Хөл кожууннуң Кызыл-Тайга сумузунга тускай шериг операциязының киржикчизи, 55-ки гвардейжи мото-адыгжы (даг) бригаданың 3-кү батальонунуң 9 дугаар ротазының взвод командири, Сүт-Хөл кожууннуң Начын мөгези, лейтенант Ай-оол Моңгуштуң чырык адынга тураскааткан сактыышкын самбыразын төрээн школазы – Кызыл-Тайга ортумак школазынга азар байырлыг хемчег болган.
Байырлыг шугум чыскаалының соонда, 18 харлыг мөгелер аразынга республика чергелиг тыва хүреш маргылдаазы болган. Маргылдаа кончуг бедик деңнелге эрткен. Тываның аңгы-аңгы булуңнарындан ниитизи-биле 34 шыырак мөге күжүн шенешкен. Сүт-Хөл кожууннуң спорт школазының тренери, РФ-тиң спорт мастери аттың эдилекчизи Семен Ондар кол судьялаан, а секретарьның чымыштыг ажылын ол-ла спортчу школаның тренери Вячеслав Тюлюш күүсеткен.
Ай-оол Владимировичиниң эштери Арсен Ондар, Айдың Дун, Эртине-Батор Ондар олар башкарыкчылаан. Мөге салыкчыларының ролюн кожууннуң спорт школазының тренерлери күүсеткен.
Аныяк мөгелерниң ачыр-дачыр тудушканының түңнелинде, Эрзин кожууннуң төлээзи Сүгдер Намчаа шүглүп үнгеш, мотоцикл болгаш 25 муң рубль база кубок, кожаа, медаль шаңналды алган. Барыын-Хемчиктиң мөгези Алаш Моңгуш үжүүрлешкеш, соодукчуну болгаш 20 муң рубль акша шаңналын алган. Үшкү черни Сүт-Хөлдүң аныяк мөгези Айрат Ооржак алгаш, соодукчу ларьны болгаш 15 муң рубль-биле шаңнаткан.
1–8 дугаар чер алган мөгелерге шаңналдардан аңгыда, Кызылдан Красноярск четкеш кээр, автобус билединиң сертификаттарын тывыскан.
Дараазында «Чараш девиг», «Тиилелгеже чүткүл», «Эң-не аныяк мөге», «Бир дугаар октаткан мөге», «Кызымак хүрежи дээш», «Бир дугаар бүрүткеткен мөге», «Эң-не ырак черден келген мөге», «Келир үениң бүзүрели» деп тывызыксыг аттарны аныяк мөгелерге организакчылар тывыскан.
Ай-оол Монгуштуң оглу Шаанакка ачазының эштери Белек, Байыр Ондарлар богбаны белекке берген.
Бистиң корр.
Чуруктарны интернет четкизинден алган.
«Шын» №35 2024 чылдың май 15
![](https://sun9-42.userapi.com/impg/iqykHU5vEJoF_5iiaB-kk0v0Zozi50IcoBWUZA/4rSoIV7VyCg.jpg?size=605x807&quality=95&sign=984b88186a981ebc321831cc308c6de2&c_uniq_tag=Eng5sElp4nwZZ9lrQgy8r7pstK5aO-M4ZM0kkcq1s8A&type=album)
![](https://sun9-7.userapi.com/impg/IqTgTABG-Y7KEpw2sKGN78-wL2Swd3j_tvK4TA/2Wf2xUvMvOM.jpg?size=807x610&quality=95&sign=02e8f6a6c95eb50b124bc0be8a15929c&c_uniq_tag=JHav-lKch9CCnhG-ODHGL3A2zCd0usgriQ8OePQzrxk&type=album)
![](https://sun9-77.userapi.com/impg/WRW2ffLVE_WFCRhm-gDtpaRY75rst22PxBVE9Q/fOcG11XPnUg.jpg?size=807x601&quality=95&sign=d9fbeb86b44b46bb3b3b488a73b4ae05&c_uniq_tag=uRBYggbkxBpHKUiQSqxxalcq3iG3M6FpWxTzDa4xDlA&type=album)
![](https://sun9-15.userapi.com/impg/yypCgxZi_GaBEluZJb3QqGljpFxJyR8nZn-7pQ/cHw5Z7uc58Q.jpg?size=807x605&quality=95&sign=02c3bdea1d0d52ed67de153f097edadf&c_uniq_tag=K6Q1VGN_jbTNFpZo7okx7lcYtn40lr7o4kV3uS1Zt4M&type=album)