Шылгарааннарны шаңнаан
Улуг орус физик эртемден Александр Степанович Попов 1895 чылда далайда корабль-биле эриктен радио дамчыштыр харылзажырының арга-дуржулгазын көргүскен. Оон-на Россияга болгаш даштыкы чурттарга радио харылзаазы дүргени-биле хөгжүп эгелээн.
Ада-чурттуң Улуг дайынының чылдарында немец фашистер-биле тулчуушкуннарга радио харылзаазы дыка улуг ужур-дузалыг болган. 1945 чылда, Улуг тиилелгениң чылында, май 7-ни Радио хүнү кылдыр чарлаан. Совет үеде болгаш амгы Россияга май 7-ни радио харылзаазының ажылдакчыларының профессионал байырлалы кылдыр демдеглеп эрттирип келген.
Май 5-те найысылал Кызыл хоорайда Аныяктар ордузунга Радио хүнүнге тураскааткан байырлал болуп эрткен. Аңаа Тываның Чазааның Даргазының оралакчызы Александр Брокерт киришкеш, радио харылзаазының ажылдакчыларынга оларның профессионал байырлалы-биле байырны чедирип, ажылынга чедиишкиннерни күзээн. Профессионал ажылынга шылгараан харылзаа ажылдакчыларынга Тываның Баштыңының шаңналдарын А. Брокерт тывыскан.
Тыва Республиканың Баштыңының Өөрүп четтириишкин бижии-биле Сибирь федералдыг округта “Главный радиочастотный центр” деп күрүнениң федералдыг унитарлыг албан чериниң Красноярск крайда талазы-биле салбырының Кызыл хоорай эргелелиниң радиохыналда бөлүүнүң инженери Юрий Владимирович Күжүгетти шаңнаан.
Тыва Республиканың Баштыңының Хүндүлел бижиин “Тывахарылзааинформ” акционерлиг ниитилелдиң кабельдиг шугумнар албанының начальниги Виктор Кызыл-Кушаевич Кыргыска тывыскан.
Тыва Республиканың Дээди Хуралының шаңналдарын “Тывахарылзааинформ” акционерлиг ниитилелдиң Кызыл-Мажалыкта харылзаа белдириниң инженери Чечен-оол Киликович Хертек, “Тывахарылзааинформ” акционерлиг ниитилелдиң Чаа-Хөлде харылзаа белдириниң начальниги Геннадий Алексеевич Докмит база “Тыва” КТРК-ның журнализи Айыраа Вячеславовна Куулар алган.
Профессионал ажылынга шылгараан харылзаа ажылдакчылары Каң-Демир Кушкаш-оолович Ооржак, Донаа Давааевич Аймаа, Омак Юрьевич Монгуш, Денис Александрович Жарков, Людмила Владимировна Бибикова, Сергей Эдуардович Санников оларга РФ-тиң Федералдыг Хуралының Күрүне Думазының депутадының Өөрүп четтириишкин бижиктерин тудускан.
Бедик мергежилдиг болгаш ажылынга шылгараңгай харылзаа ажылдакчылары Тыва Республиканың Сан-чурагайлыг хөгжүлде яамызының шаңналдары-биле шаңнатканнар.
Тываның ат-сураглыг артистери, ыраажылары Радио хүнүнүң байырлалын уянгылыг ырылар, чараш танцылар-биле каастап, харылзаажыларга аян тутканнар.
/ Лопсан МОНГУШ.
"Шын" №33 2023 чылдың май 6
